Deputy CM-in Faina Hapta a hawng

4th October, 2022

Deputy chief minister Tawnluia, UDPA department enkawltu chuan nimin khan Secretariat complex-ah Faina Hapta (Cleanliness Week) vawi 46-na a hawng. Faina Hapta hawn ní hi Swachhata Diwas (Faina Ni) atan hman a ni a, hmun hrang hrangah faina hnatlang huaihawt a ni.

Faina Hapta hian October 8, 2022 thleng a awh dawn a, thupui chu 'Bawlhhlawh paih hmaa thliar hran' tih a ni. Hapta chhungin mimal in, zirna-in, sumdawnna hmun, sakhaw hmun leh sorkar pisaahte bawlhhlawh thliar hran inzirtirna beihpui thlâk a ni ang.

Deputy chief minister chuan India hnampa Mahatma Gandhi pian champha puala kum tina neih ṭhin Faina Hapta chhungin Mizoram sorkar pisa te, zirna-in te, damdawi-in te, bazarte leh mipui pun khawmna hmunahte faina beihpui thlak a nih dawn thu a sawi a, "Mizoramah faina leh hriselna kawnga sorkarin enkawltu tur a buatsaih PHE departmentin thingtlang lam an enkawl a, UDPA-in khawpui lam a enkawl thung. Aizawl khawpui bikah Aizawl Municipal Corporation chu mawhphurtu ber a ni," a ti.

Faina leh thianghlimna chu mahni in chhungah ṭheuh bul ṭan tur a nih thu sawiin Tawnluia chuan, "Chhungkaw tinin tih tak zetin ṭan la se ka duh.Upa zawkte tih turah dah mai loin, ṭhalaite'n mawhphurhnaah lain hma an hruai tur a ni," a ti a; faina beihpui thlak chu Faina Hapta chhung chauha duhtâwk lo a, chîn ṭhanah neih a ṭul thu a sawi.

UDPA Minister chuan, Tuirial leh Kolasib-ah solid waste management centre pilot project a awm mek thu te, Aizawl hmun hrang hrangah solid waste management centre din tum a ni a, a hmun turte ruahman lâwk tawh a nih thu te, Swachh Bharat-II kalpui mekah Mizoram chuan ODF
Plus a nih ngei theihna turin ṭan lak a pawimawh thute a sawi bawk.

Faina Hapta hawnna inkhawmah hian inelna hrang hrang lawmman sem a ni a, AMC deputy mayor R Thanglura, UDPA secretary Lalmalsawma leh mi pawimawh dangte an tel. Faina Hapta hi Mizoramah October 2, 1977 aṭangin kum tin hman a ni a; Mizoram khawpui hrang hrangah
October 1, Inrinni khan hawn a nih laiin, Aizawl leh Serchhipah erawh chuan nimin khan hawn a ni.