National Wildlife Week hman ṭan a ni

Nungcha humhalhna hapta, National Wildlife Week vawi 68-na chu nimin khan hman ṭan a ni a, Environment, Forest & Climate Change (EFCC) minister TJ Lalnuntluanga'n Assembly Annexe conference hall-ah a hawng. Week thupui chu 'Climate change & wildlife conservation' tih a ni a, district dangah pawh hawn a ni.

EFCC Minister chuan, India ram pumah kum tin nungchate humhalhna hapta hman ṭhin a nih thu sawiin, "Hapta in a tum chu - ramngaw leh nungcha humhalh lama mi tinin an tih tur inhrilhfi ah te, kan dam khawchhuahna tura nungchate pawimawhna leh kan chhehvel kan chenna chereu zel tur do te, kan tu leh fate tan ro hlu kan hnutchhiah theihna tur inzirtir leh infuihnate a ni," a ti.

Sorkar laipuiin kum 1972 khan nungchate chenna leh anmahni humhalhna dan Wildlife Protection Act a duang tih sawiin TJ Lalnuntluanga chuan, "He dan hi Mizoramah kum 1974 khan hman ṭan a ni. Ramsa leh nungchate chenna venhim hi Wildlife Protection-in a tum a ni a, Mizoram hi khawvela biodiversity hotspot 36 zinga pakhat niin, flora & fauna-ah kan hausa hle," a ti a; chu'ngte venhim chu mi tin mawhphurhna a nih thu a sawi.

EFCC Minister chuan, Mizoramah protected area 10 - national park pahnih, wildlife sanctuary pasarih leh tiger reserve pakhat a awm thu te, khaw hrang hrangah community forest reserve a awm thu leh nungchate tan chenna ṭha a nih thute a sawi bawk.

National Wildlife Week hawnnaah hian high school, college leh university zirlai zinga Wildlife Week puala lemziak intihsiaka ti ṭhate hnenah lawmman sem a ni a; PCCF RK Singh, Serchhip College assistant professor Dr C Vanlalnghaka, Aizawl DFO Laltlanhlua Zathang leh chief wildlife warden Lalrammmawii Sailo te pawhin thu an sawi a ni.