Ruihhlo hrang hrangin nasa takin min rûn mek - END Minister

Siaha District Ruihhlo Do Committee chu nimin khan DC conference hall-ah an ṭhukhawm a; an hun hmanpuitu Excise & Narcotics minister Dr K Beichhua chuan, Mizoram chu ruihhlo chi hrang hrangin nasa taka a rûn mek thu a sawi.

Dr K Beichhua chuan, ruihhloin Mizoram a rùn nasat avangin sum indaih loh leh thawktu indaih loh sawi hman a ni tawh lo tih sawiin, "Kan indaih hun nghak hman kan ni ta lo. Ruihhloin min tihchhiat vek hma hian tuna kan dinhmun leh kan nihna ang ang hian theihtawp chhuahin Excise leh Police nen tlawmngai pawl, kohhran, VC leh chanchinbumite nen ṭanghoin ruihhlo do beihpui i thlak ang u," a ti.

Tlawmngai pawl leh kohhrante'n ruihhlo donaa sorkar an thláwp tlat ṭhin chu lawmawm a tih thu sawiin K Beichhua chuan, "Mipui thlàwpna tel lo, sorkar chakna chauh chuan ruihhlo hi do hneh chi rual a ni lo," a ti a, District Ruihhlo Do Committee hmalakna turin cheng nuai 300 dil mek a nih thu a sawi.

Ṭhutkhawmah hian local/village level-ah Ruihhlo Do Committee din remtih a ni a, hruaitu turte chu District Committee-in a la ruat dawn a ni.