Bairabi Zophaia Assam bûk sak MZP-in pawm theihah an ngai lo

MZP Gen. Hqrs chuan thuchhuah siamin, Assam sorkarin Bairabi Zophai, status quo huam chhungah October 2, 2022-a bûk pahnih an sa chu an hriatthiam loh thu leh pawm theiha an ngaih loh thu an tarlang.

MZP chuan, Zophaiah Assamin bûk an sa tih an hriat veleh enfiah turin Zophai an pan nghal tih sawiin, "In an rawn sak hi ṭhiat nghal turin Assam sorkar kan phût. An hmalakna ngun taka thlithlai a nih hnu, vawiin (October 3) chhun dar 12:30 hian Assam sorkar chuan an ṭhiat zui ta a ni," an ti.

Mizoram leh Assam ten ramri chungchanga buaina an neihte dawhkân kîla sawifel tuma inbiakna kalpui a nih mek thu sawiin MZP chuan, "State pahnihte'n kutthlak lo tura an tihna status quo zah zo loa Assam sorkar an che leh ṭhin hi Mizoram sorkar leh Mizo mipui zahlohnaah kan ngai a, ti tawh lo turin kan duh," an ti a; tun hnuah an ti leh a nih chuan mipui chêt hmaa rang tak leh na taka chháng lêt nghal zel turin Mizoram sorkar an phût tih an tarlang.

MZP chuan, Mizoram sorkarin chak taka hma la a, force lam mi a hmunah a dah nghal chu lawmawm an tih thu leh a ṭul apianga hma latu Bairabi khawtlang mipui hmalakna fakawm an tih thu an tarlang bawk.