Chief Minister, minister leh MLA-te'n Hna tam tak an thawk - Dr Thangtea

MNF adviser leh Health minister Dr R Lalthangliana chuan, MNF party-in hruaitu ṭha an neih thu leh hripui léng karah Chief Minister, minister leh MLA te'n hna tam tak an thawh thu a sawi.

Nimina Mizo Hnam Runa inkhawmah thu sawiin Dr R Lalthangliana chuan, kum 3 leh thla 10 an sorkar tawh chhungin Covid-19 léng bakah, vawk pûl hri, lirnghing, raltlan dawnsawn leh harsatna tam tak an tâwk tih a sawi a, "Heti chung hian CM leh minister/MLA-te'n sawi sên loh tam tak hna kan thawk a ni," a ti.

Health Minister chuan, MNF sorkar chhunga harsatna tam tak chu thleng lo se, thil ropui tak tak a thlen tam tawh tur thu sawiin, "Hripui léng kha khawvel ram ropui ber leh thil ti thei ber pawh an mualpho nasa a, India ram state tinte'n harsatna kan tâwk. SEDP kan duan lai khan harsatna thleng tur kan hre lâwk si lo a, ṭhenkhatin, 'An sawi angin an ti leh si lo' tih hi a awm fo a, kan harsatna tawh kha khawvelin min hriatpui a ni," a ti a; hripui léng tur an hriat lâwk loh avangin a dona tur budget-ah an dah loh thu a sawi.

MNF adviser R Lalthangliana chuan, MNF thil tum chu Mizote hnama dintu Pathian ṭih a, 'Pathian leh kan ram tan' tih a nih thu sawiin, "A din tirh aṭangin a hawi zawng leh kal dan mumal tak nei a ni a, kan sakhua leh hnam chawisan a, Zo fa ram hrang hranga awmte min phuar khawm a, pum khata siam hi a ni," a ti.

R Lalthangliana chuan, MNF chuan hruaitu ṭha Zoramthanga an nei a, an vannei nia sawiin, "Zu far khat pawh la tem chhin ve lo, ṭawngṭaia Pathian ráwn zel mi, leadership nei ṭha bik Pu Zoramthanga'n min hruai a, a kaihhruaina hi kan ring tâwk," a ti a; Mizo Kristian rama roreltute chu Pathian ruat ngei an nih thu a sawi bawk.