Assam bûk sak ZPM hruaitute'n tlawh

ZPM party leh ZPM Ṭhalai hruaitute chuan Assam sorkarin Bairabi Zophaia bûk an sak chu enfiahin nimin khan an kal a; ramria duty Mizoram police-te chêt vel awlsam theih nan a rang thei ang bera hma la turin Mizoram sorkar an ngen.

Zophai tlawhnaah hian ZPM general secretary i/c Boundary Lalmuanpuia Punte leh ZPM Ṭhalai president Malsawmzuala Ralte hoin ṭhalai hruaitu eng emaw zat an kal a; Lalmuanpuia Punte chuan, Assam-in tun ṭuma ban an phun tirhin Bairabi aṭangin report an dawng a, ZPM leader Lalduhoma'n Home Minister a hrilh nghal a, hmalak vat a ṭul thu leh ngaihven thuai a ṭul thu a hrilh tih a sawi.

Lalmuanpuia Punte chuan, bûk sa ngam tura Assam lam ngampa taka an awm chu Mizoram sorkar inthlahdah vang a nih thu sawiin, "Mizoram sorkar a inthlahdah hi a pawi kan ti tak zet. MZP leh Bairabi khawtlang mipui an fakawm kan ti a, an hmalakna avanga ṭhiah a ni ta hi a lawmawm tak zet a ni," a ti.

ZPM hruaitute hian Zophaia Mizo IR police camp pawh an tlawh a, camp aṭanga an dutyna hmun Mizoram leh Assam ramri panna kawng chu km. 2 vela thui, metal loh a nih avangin Mizoram police-te chêt vel awlsam nan a rang thei ang bera hma la turin Mizoram sorkar an ngen a ni.