Thlêmna hneh theih a ropui rualin, thlêm ngam loh nih a ropui zual - Duhoma

ZPM leader Lalduhoma chuan nimin khan Keifang Venghlun YMA Zawlbuka ZPM Ṭawi East Block political training-ah thu sawiin, thlêmna hneh theih a ropui rualin, thlêm ngam loh nih a ropui lehzual tih a sawi a; rinawm tur leh a ram leh a felna zawng hmasa turin mipui a chah.

Lalduhoma chuan, "ZPM culture chu Zo nun ze mawi, Kristianna nena inrem a ni. Thlêmna hneh theih hi a ropui a, a aia la ropui zawk chu thlêm ngam loh nih hi a ni. Thlêm ngama awm chu kan lo dûp tawh ṭhin tihna a ni a, rinawm hi a tlo ber a, keimahni avangin mite'n lo tel an châkin an hreh thei. A ram leh a felna zawng hmasa zel turin, mi dang tana malsawmna ni turin i thawk ang u," a ti.

Lalduhoma chuan, kum 2023-ah sorkarna siam tumin theihtawp an chhuah tih sawiin, "Hmabak kan la ngah, rim leh zual a thawk turin kan inngen a ni. ZPM-in collective leadership kan nei hi kan hlâwkpui a, president, leader, working president kan nei hi a hlâwkin kan party tan a ṭha em em a ni," a ti a; mi party inrêlbàwlnaah an inrawlh lo a, ZPM inrêlbàwlnaah party dang an ràwn a ṭul loh thu a sawi.

ZPM working president K Sapdanga pawhin thu sawiin, "Thluaka sum lût natna kan vei tawh chuan leilung leh a chhunga thil awm zawng zawng hi lei leh hralh theih vekah min ngai a ni ta ber. Kan vote hi lei leh hralh theih anga zuamawma kan lantir tawh chuan party policy leh manifesto-in awmzia a nei lo a, candidate ṭha neih a sâwt hek lo," a ti.

K Sapdanga chuan, sum nei lo tana inthlana candidate ngam lohna, candidate tura sum neih hmasak ṭula hriatna, hausak vang ngawta tling tura inngaihna a awm a hlauhawm thu sawiin, "Hei hian politics hi mi hausa, rilru dik lote game-ah a chantir thei. Politics kan tih hi mi hausa ṭhenkhat chuan gambling angah an ngai. Tling tura an rinah sum an thàp ang a, an tlintir chuan contract leh supply hna an hmu let leh mai dawn.

Heng tireh theitu hi voter kan ni," a ti a; sum sem vanga chak tumte chak lohtir theitu chu mipui an nih thu a sawi. Tunah chuan political party páwna mite'n politics an ngaihven tawh tih sawiin, "Party páwna mite chuan ṭan lam nei loin thil an thlir a, tun hi mangan hun a ni tih an hrethiam. Kan hmabak inthlanah politics ngaihven nasa ber turte chu sorkar hnathawkte an ni dawn a, an tan chuan politics hi politics a ni tawh lo, an chaw bél a ni. Hlauh an nei tlem tial tial a, an rilru an sawi chhuak ngam tial tial bawk," a ti.