Aizawlah mediation chungchang inzirtir

Samkhai zawk leh sum sên ngai loa thubuai chinfelna chi khat, mediation chungchang inzirtirna nimin khan Administrative Training Institute auditorium-ah buatsaih a ni a, Mizorama a vawi khatna niin, Gauhati High Court judge Justice Nelson Sailo, Gauhati High Court Mediation Monitoring Committee member ni bawkin a hawng.

Mediation chungchanga thil pawimawhte zirtir turin Supreme Court aṭang leh Karnataka leh Assam aṭangin mithiamte an rawn kal a; training-ah hian Mizoram Judicial Service officer ṭang lai leh pension tawh te, ukilte leh Lok Adalat conciliator-te telin, ni nga chhung neih a ni ang.

Justice Nelson Sailo chuan, Mizoram State Legal Services Authority-in Supreme Court Mediation & Conciliation Project Committee kaihhruainaa mediation training an buatsaih chu lawmawm a tih thu a sawi a, "Mizote hian kan phâk tâwkin thubuai hlabuai rem kan lo ti tawh ṭhin. Inremna tluantling a awm a, awlsam zawka kan harsatna chinfelna turin mediation hi a pawimawh hle a ni," a ti.