KHAWTHLIR

Thisen pe
KṬP, Khankawn Branch chuan nimin khan Champhai District Hospital blood bank-ah thisen unit 11 an pe. Khankawn Branch KṬP hian Pathianni khan Champhai Hospital Branch KṬP an tlawh a, an haw hmain thisen an pe nghal a ni.

Faina Hapta
AMC deputy mayor R Thanglura chuan nimin khan Republic Vengthlangin Faina Hapta an hman ṭan tur a hawng. Republic Vengthlang hian
September thlaah Faina Beihpui thla an hmang ṭhin a, kum 2013 aṭangin kumtluana faina hnathawk tura inpe sanitation volunteer dinin, 
chawlhkar tin Thawhlehni apiangin veng chhung an tifai ṭhin. Kum 2013 aṭangin Aizawla veng fai lawmman ṭum sarih an la tawh bawk.

Huaisen turin phût
PC party chuan thuchhuah siamin, Assam mite'n October 2, 2022-a Mizoram chhung Bairabi dáia bûk an sa chu an duh loh tak zet thu an tarlang a, "MNF sorkar hnuaia Assam an rawn huangtau leh ṭhin hi pawi kan ti hle. Sorkar ṭuan rang leh huaisen kan mamawh tih a langah kan ngai," an ti. October thlaa Mizoram leh Assam sorkar aiawhte Guwahati-a an inbiak turah mipui náwlpui duh dana huaisen ngam tawh turin
Mizoram sorkar an phût tih an sawi bawk.

Pu Buanga Award
Mizo Academy of Letters (MAL) Joint Headquarters, Lunglei chuan thu leh hla lama sûlhnu nei ṭhate chawimawina an hlan ṭhin Pu Buanga Award dawng turin Prof. RL Thanmawia an thlang. Pu Buanga Award hi October 12, 2022 khian Art & Culture Auditorium, Lungleiah hlan a ni ang.

Congress inkhawm
Mizoram Pradesh Congress Committee (MPCC) chuan nimin khan Congress Bhavanah Pathian hnena inhlanna inkhawm an buatsaih a, thupui chu 'Ram chu Lalpa ta a ni' tih niin, Evangelistic Team speaker Upa LH Rohmingliana'n thuchah a sawi. Inkhawm hi MLA Lalrindika Ralte-in a
kaihruai a ni.

Kawng siam dawn
Tlangnuam (Mual Veng) leh HridaiKawn inkar kawng chu PWD-in vawiin aṭanga October 8, Inrinni thleng chawhma dar 10 aṭanga chawhnu dar 1
inkar leh, chawhnu dar 2 aṭanga tlai dar 5 inkarchhungin an siam dawn a, hei vang hian Traffic SP Rodingliana Chawngthu chuan hna thawh chhungin kawngpui khâr tur a nih thu a puang.

Covid ràlna hlan
Covid-19 kaihhnawiha duty-naa kum 2020-a chetsualnaa thi mi pahnih hnenah October 2, Pathianni khan Pradhan Mantri Garib Kalyan Package: Insurance Policy hnuaia ‘Accidental loss of life due to Covid-19 related duty’ kaltlangin an chhungte hnenah ràlna Rs 50,00,000 ve ve hlan a ni. Ràlna hi Lalpianvula, Zawlnuam Bawrai VLTF member leh Rohmingliana, Mizoram Police havildar chhungte
hnenah pek a ni.