Khehpuam kaihhnawihah ; CIC hlui Robert Hrangdawla Central Jail-ah dah luh a ni

Mizoram Chief Information Commissioner (CIC) hlui, Robert Hrangdawla, IAS (Rtd.) chu khehpuam (pseudoephedrine) lei leh hralh thubuaiah man a ni a; Court thupek angin nimin khan Central Jail-ah dah luh a ni.

Thu dawn danin, Robert Hrang­dawla lakah Health department-a Food and Drugs Administration (FDA) chuan pseudoephedrine lei leh hralh chungchangah Court-ah criminal complaint an thehlut a; Vanlalenmawia ṭhutna Special Court (Drugs & Cosmetics Act) chuan nimin khan Robert Hrangdawla bail dilna hnâwlin, judicial remand turin a ti a, Central Jail-ah thawn nghal a ni. A rual hian a sumdawnnaa a thurualpui Lalchhanmawia pawh Central Jail-ah thawn a ni bawk.

Thu dawn danin, February 22, 2017 khan Lengpui Airport-ah Cetri-P mûm nuai 10 man a ni a, Dehraduna-a Cooper Pharma Limited-in Aizawl Luangmuala R&R Medicare-a thleng tura a rawn thawn a ni. R&R Medicare hi Robert Hrangdawla ta a ni.

Health Services joint director (FDA) Lalsawma sawi danin, khehpuam neitu nia hriat Robert Hrangdawla chuan license nung lai a nei a, a leiin a hralh thei. Mahse, a tihral dan (a hralh chhawnna) FDA-in an hre duh a, a neitu hian a hralhna record a neih loh avangin a tihral dan hriat a ni lo.

Pseudoephedrine chu a hlawma hralh a nih pawhin, license holder vek hnenah an hralh tur a ni a; Robert Hrangdawla'n a tihral dan hriat theih a nih loh avangin a lakah FDA chuan assistant director Thanchungnunga hmingin Drugs and Cosmetics Act hmangin Court-ah complaint an thehlut a ni.

FDA hotute dawi danin, Taxation hnathawkte'n khehpuam an mansak hma pawhin Robert Hrangdawla hian license hmangin kumin tir lam khan thla tin vawi thum aṭanga vawi nga vel khehpuam tam tham tak a chah lut tawh bawk.

Court-in a koh angin Robert Hrangdawla chu April 7, 2017 khan Aizawl District Court-ah a inlan a; a laka FDA-in complaint an thehluh chu ziakin pek/hriattir niin, thla khat hnuah a chhanna Court-a pe tura tih a ni.

Robert Hrangdawla hi July 25, 2017 khan Aizawl District & Session Court-ah a inlan leh a; chumi ṭum chuan a ukilte chuan criminal complaint titawp turin Court an ngen. An ngenna chungchangah hian Court-in sorkar ukil-te chu an ngaihdan August 17, 2017 hmaa ziaka thehlut tur leh an chhanna chu Robert Hrangdawla ukil-ten an zir chian theih nan August 11 hmaa pe turin a ti.

Court order-a a lan danin, Robert Hrangdawla hian drugs retail license no. 0101110283 & 1010110284 leh wholesale license no. 0201110233 & 0201110234 a nei. A lakah thubuai an ziah luhna dan hi bail theih lohna a ni a; Robert Hrangdawla hian nimin vek khan bail dil mah se, Special Court chuan a phalsak lo a ni.