Kut min thlâk ngei- Chawngte MSU

MSU sub-headquarters, Chawngte chuan thuchhuah siamin, Kamalanagar College-ah Chakma zirlaite'n MSU hruaitute kut an thlak ngei niin an tarlang a, hemi chungchangah hian Chakma-te chu dâwt sawiah an puh.

Chawngte MSU tarlang danin, Chawngte HSS sport lai chu Chakma ṭhenkhatte'n an tihbuai avangin tihtawp a nih thu an dawng a, MSU hruaitu­te palite chu thu chiang hriat tumin Chawngte HSS Principal an hmu. Principal chuan sport tihtawp chu thu dik a nih thu leh a ṭum khatna a nih loh thu a lo hrilh a; chu vang chuan MSU-te chuan zirlaite thlavang hauh an tum a ni.

Chakma-te thil tih duh loh lantirna atan hian Chawngtea high school chin chung lam khâr turin thutlukna an siam a, an thutlukna sawipui turin September 8, 2017-ah MSU hruaitute palite chu Kama­lanagar College-ah kalin, MSU presi­dent Vanlalropuia leh assistant professor Dr Joytimory Chakma te chu an inbia a ni.

Páwn lamah thâwm a bengchhen avangin MSU President leh Dr Joytimory Chakma te páwna an va chhuah chuan MSU hruaitu dang pathumte'n kut an lo tuar tawh a, MSU President pawh kut an thlak chhunzawm ve nghal a ni. He buaina avang hian police leh CRPF pawh an inrawlh a ni.

Chakma-te'n social media leh chanchinbu hrang hrang dâwta an hêk nia sawiin Chawngte MSU chuan, "Kut thlak hmasatu zawk anga MSU-te an puh mai leh Chakma hoin MSU-te kut an thlak loh thu an sawi ngam mai hi a rilru natthlak tak zet a. MSU hian Chakma-te hi kut an thlak hmasa lo a, thlak pawh an tum lo a, mi za rual an chêt takah chuan lo inven ve kha chu tihmâkmawh a ni," an ti.

Chawngte MSU chuan, pawisawi lo leh fel tak tak karah Chakma sual leh Mizo haw hrim hrim an awm nia sawiin, "Dan loa ramri paltlangtu Bangladesh, Tripura leh Arunachal aṭanga Chakma Mizorama rawn insuan lut tam tak, sual tak takte vang hian buaina kan tâwk fo mai hi kan rilru a na ngawih ngawih a ni," an ti a; tun buainaah hian Chakma zawng zawng ni lo, pawikhawitu bikte'n tuar se an duh thu an sawi.

He thilah hian Chawngte-a tlawmngai pawl (NGO) hrang hrangin September 30, 2017-ah Chawngte Police Station-ah FIR an thehlut zet a; nimahsela MSU tih loh pawl dang zawng chu an inhnûkdâwk leh a ni.