Mipa leh hmeichhiate intluktlânna zirho

Mizoram University-a Women’s Studies Centre, State Resource Centre for Women leh Social Welfare department-te chuan, nimin khan Synod Conference Centre-ah 'Gender Equality and Women Empowerment in North East India with Special Reference to Mizoram' tih thupui zirhona an buatsaih a, Social Welfare minister PC Lalthanliana'n a hmanpui.

PC Lalthanliana chuan, hmeichhiate hamṭhatna, himna leh hmasawnna turin sorkarin ruahmanna hrang hrang a siam tih sawiin, "Dan pawh eng emaw zat siam a ni tawh a, a hmang ṭangkaitu turin heng hi an hriat a, an hman thiam a pawimawh," a ti a; hmeichhiate tihchak chungchangah tihchak ngai nia inhriatna nuaibo a, anmahniah theihna leh chakna nei sa an nih­zia inhre turin a fuih.

Mizo hmeichhiate chu an duai lo a, ngaihtuahna fing leh remhriatna nei ṭha, hmangcháng hria leh taima an nih thu sawiin Social Welfare Minister chuan, "Thei lo nia inhriatna in nei a nih chuan paih a, hma lam panin theihtawp chhuah ang che u," a ti.

Women’s Studies Centre director Prof. Lalneihzovi chuan, India ramah hmeichhia leh mipa inthliar hranna awm loa dinhmun inanga an din theihna tura ṭan lak a ṭul thu sawiin, "Ram rorelna, zirna, sakhua, ei leh bar zawnna leh kawng tinrengah hmeichhiate leh mipate dinhmun a la inthlau hle," a ti a; intluk­tlanna tak tak nei thei turin kawng thui tak zawh a la ngai niin a sawi.

Seminar-ah hian mi­thiam hrang hrangte thuziak zirho a ni.