Mizoramah RTI Week hman a ni

Nimin khan Aizawl leh district khawpui hrang hrangah Right to Information (RTI) Week hman a ni a, Aizawlah chuan Synod Conference Centre-ah hman niin, chief minister Lal Thanhawla'n a hawng. RTI Week hi October 12 thleng hman a ni ang.

Chief Minister chuan, RTI Week chu Mizoramah kum 2011 aṭanga hman ṭan ni mah se, mipui tam zawkin RTI hman ṭangkai dan an thiamna tur leh hman a ṭulnate an hriat zau zel theih nan hman chhunzawm zel a ni a nih thu a sawi a, "RTI hnuaia zawhnate chhan hi officer-te hnathawh kalphung pangngai a ni a, mipuite'n sorkar hnathawkte hna chuangliam an siamsakna a ni lo," a ti.

RTI chu a nih tur ang taka hman a nih chuan thil ṭangkai, sorkar leh a mi chhawrte thlenga nawr kalna hmanrua a nih thu sawiin CM Hawla chuan, "Mipuite'n an tana thawk, sorkar leh sorkar hnathawkte taimakna leh ṭan lak dan chin thlengte pawha an hriat chian ve theihna hmanruaah RTI hi hman theih a ni," a ti a; mipuite'n RTI hmang uar deuh deuh se a duh thu a sawi.

Lal Thanhawla chuan, sorkar tan RTI chu huphurha hnehin thlàwp awm tak a nih thu a sawi a, "RTI hi mipuite hnena sorkar hnathawhna chanchin chiang zawka hmuhtir leh bihchiantirna hmanraw ṭangkai tak a ni. Hre chiang loa selna ṭawng­kam neih nghal mai ai chuan, RTI tarmit aṭanga bihchian hmasak phawt a finthlak zawk a, kan vaia tana hlawkpui tur zawk a ni," a ti.

RTI chu mi zawng zawng tan a nih avangin, zirlaite tan pawh an answer sheet an hriat chian duh phawt chuan RTI hmangin an hre thei tih sawiin Chief Minister chuan, "People friendly government, transparent government siam tumin hma kan la mek a, RTI hi kan hmanraw pawimawh ber tur pakhat a ni," a ti a; RTI chu sorkar kal fuh lo tur venna atan pawha thil ṭangkai tak a nih thu a sawi.

Chief Minister hian tunlai thiam­na hmanga duan, RTI hma­laknaa thil thar siam Mizoram RTI online, desktop computer leh mobile phone aṭanga internet hmanga RTI zawhna thehluh theihna a hawng nghal.

Chief information commission (CIC) Lalduhthlana pawhin thu sawiin, RTI hmang an tlem chhan chu RTI hmelhriat lohna ai mahin, a ṭangkaina hriat chian tawk loh vanga a ngaih thu a sawi a, "Duhthusam leh hriat duh ang pek loh vanga vuivaina thlenna kawngah Mizorama RTI chungchanga thuneitu sangber MIC-a zualko vawi hnihna tur chuan India ramah case khawih lai a nei tlem ber," a ti.

Inkhawmah hian Mizoram State e-Governance Society project manager Issac Zothanpuia'n CM-in a tlangzarh tak RTI Online chungchang a sawifiah. Issac Zothanpuia sawi danin, www.rti.mizoram.gov.in ah RTI hmangin zawhna zawh theih a ni. Mobile phone aṭang chuan Google Playstore-ah Mizoram RTI Online App download-a install a ngai thung.