MSU hruaitute police kutah an inpe ; Chakma House-ah mikhual la thleng lo

September 28, 2017-a Chakma House-a bung­raw ṭhenkhat tih­chhiat chungchangah Mizo Students Union (MSU) general head­quarters office bearer mi parukte chu nimin khan Vaivakawn Police Station-ah an inpe. Chakma House-ah hian mikhual thleng an la awm lo a, police-in an veng reng a ni.

Tarlan tawh angin, Chawngte-ah Chakma ṭhalaite'n MSU hruaitu ṭhenkhatte kut an thlak nia sawi avangin MSU gen.hqrs. hruaitute chu September 28, 2017 tlai khan Hunthar Veng, Aizawla Chakma House-ah kalin, bungraw ṭhen­khat an tichhia a ni.

Chakma House-a bungraw ṭhenkhat tih­chhiat chungchangah hian MSU gen. hqrs. office bearer paruk-te chu an president RB Lal­malsawma hoin nimin chaw­hnu dar 2 khan Vaiva­kawn PS-ah an inpe a; an lakah hian IPC Section 448, 342, 427 leh 506 hmangin thubuai ziah luh a ni.

MSU chuan thuchhuah siamin, Chakma House-ah bungraw chhia a awm avangin MSU hruaitute chu case siamsaka man tura tih a ni tih an tarlang a, "Mikhual chám reite vanga ram leilung fa zawkte Mizoram Police-te'n min man a, buaina leh harsatna a thlen zui zel loh nan Vaivakawn PS-ah kan inpe ta a ni," an ti.

MSU gen. hqrs. hruai­tute hi nimin vek khan bail-in an chhuak leh nghal a ni.

Hetih lai hian, Chawng­te MSU hruaitu ṭhen­khatte Chakma ṭhalaite'n Chawngte-ah kut an thlâk nia sawi kal zelah, MSU gen.hqrs.-in Aizawla Chakma House-ah mikhual thlen an remtih loh avangin, September 29, 2017 aṭangin mikhual thleng an la awm leh lo.

Chakma House enkawltute'n Vanglaini palai zawhna chhanga an sawi danin, Chakma House-ah hian ṭum khatah mikhual 30 vel a thlen theih a, a hma chuan mikhual an awm khat deuh reng a; September 29 aṭang erawh chuan tun thlengin mikhual thleng an la awm leh lo. Damlo pakhat erawh a la awm mek thung.

Chakma House hi engtik lai pawhin IR police pasarih, Vai­vakawn PS aṭangin police pahnih leh Mizoram Home Guard mi 20 velin an veng reng a ni.