Lung natna nei zawn chhuah hna thawk
Health & Family Welfare department hnuaia National Health Mission pêng pakhat, Rashtriya Bal Swasthya Karyakram (RBSK) leh Manipal Hospitals, Bangalore ṭangkawp chuan nimin khan Aizawl West DEIC, Kulikawnah Screening Camp for Congenital Heart Disease an buatsaih a, Health minister Lal Thanzara'n a hawng.
Inkhawm hi NHM mission director Dr Lalrozama'n a kaihruai a; Health Minister chuan, Mizoram NHM leh Manipal Hospitals-in August 28, 2017 aṭangin pian tirh atanga lung natna (congenital heart disease) enkawl dan tur chungchangah inremna an lo ziak fel tawh tih a sawi a, "Inremna bawhzuia vawiina screening camp neih theih a ni hi a lawmawm tak zet a ni," a ti.
Lal Thanzara chuan, RBSK hnuaiah nausen piang hlim aṭanga kum 18 inkarte hriselna endik ṭhin a nih thu sawiin, "Natna chi hrang hrang 30 thlan chhuahte en bik a ni a, natna thlan chhuah ni ve lote pawh naupangin an vei em tih chhinchhiah tel ṭhin a ni," a ti a; RBSK record aṭangin naupangte'n eng natna nge an vei tam ber tih a hriat theih tur thu a sawi.
Health Minister sawi danin, sorkar kum kal mekah, April-August, 2017 inkarah RBSK hnuaia naupang hriselna endiktu mobile health team-te'n naupang 1,14,138 an endik tawh a, chung zingah chuan pian tirh aṭanga lung natna nei naupang 12 hmuh chhuah an ni.
Natna zawn chhuah hna chu khawpui leh thingtlang hmun hrang hranga damdawi-inah te, Health sub-centre-a nau neih theihna hmunahte kalpui a ni a; sorkar school, sorkarin a puih sikul leh anganwadi center-ahte mobile health team-in natna nei an zawng ṭhin bawk.
Screening Camp for Congenital Heart Disease-a pian tirh aṭanga lung natna nei zai ngai an awm chuan Manipal Hopsitals-in a thlawnin an enkawl dawn a; kalna senso chu RBSY emaw, Mizoram Health Care Scheme-a in-register-te tana scheme-in a pek theih zat an bill thei ang a, inziak lut lo tan kalkawng man chu mahni intum a ngai thung.