Chakma-te humtu-ah Congress puh

ZNP ṭhalaite chuan thuchhuah siamin, Congress party chu Chakma foreigner-te humtuah an puh a; Chakma foreigner-te dap chhuah kawng­ah Congress sorkarin a thawk ṭha ber anga chief minister Lal Thanhawla'n a sawi chu thu belhchian dâwl lo niin an tarlang.

ZNP ṭhalai chuan, October 4, 2017-a Congress City Wokers' Meet-a CM Lal Thanhawla'n, 'Chakma foreigner leh a rûka lo lutte dap chhuah­a nawr lêtna kawngah Congress sorkarin an ti ṭha ber,' nia a sawi chu belhchian dâwl lo niin an sawi a, "Congress sorkar hian kum 1995 bâwrah Chakma foreigner-te hnawhchhuah leh electoral roll aṭanga paih tuma MZP hmalakna nasa taka dodal­in, sipai chakna hmangin a nawr bet zawk a, MZP volunteer ṭhenkhat phei chu helicopter-a phurh ngai khawpin an hliam a ni," an ti.

ZNP ṭhalai tarlan dan­in, kum 1987 aṭanga Mizoram state nih hnuah Congress-in sorkarna an chan apiangin Chakma minister an awm ziah a, term li an sorkar tawh chhungin Chakma minister pathum an awm tawh. Police venhimna hnuaia Chakma zirlaite Mizoram quota-a MBBS zirtir tumin counselling tihna hmunah hruai an ni.