AMC-in poster/banner siamṭhatsak
Aizawl Municipal Corporation (AMC)-in kumin August thla tawp lam aṭanga phalna (permit) nei loa Aizawla hoarding, poster leh banner târte an senghawinaa Durtlang huam chhunga hoarding, banner leh poster an tihchhiat ṭhenkhat chu an siamṭhatsak.
AMC Display of Advertisement and Hoarding Regulation 2013 anga permit nei loa hoarding/banner/poster târte AMC-in an senghawinaah hian, Durtlang khaw huam chhunga kohhran leh kohhran ṭhalai pawlte'n Pathian thu leh nun dan ṭha inkaihhruaina thuziak an târte pawh tihchhiat a ni. Hemi chungchangah hian Durtlang Joint NGO-te chu an lungawi lo a, AMC chu September 4 thla chhung ngeiin an thil tihchhiatte siam-ṭha turin an phût a ni.
Durtlang khawtlang phût angin AMC chuan Durtlang huam chhunga hoarding/banner/poster an tihchiatte chu an siamṭha tawh. Hoarding/banner/poster siamṭhat hna hi a tàrtute'n an buaipui a, a siam man erawh chu AMC-in an tum dawn thung. Durtlang Joint NGO-te chuan hoarding/banner/poster siamna senso lakna tur bill pawh AMC-ah an thehlut tawh nia thu dawn a ni.
AMC chuan Display of Advertisement and Hoarding Regulation-in a phût angin, Aizawla hoarding/banner/poster târte an enfiah mek zel a, phalna nei loa târte chu an senghawi zel a ni. Dan loa târ a ni tih an chhinchhiah neitu zinga tam tak chuan AMC aṭangin phalna an la tawh nia thu dawn a ni.
Hetih lai hian, Aizawl veng ṭhenkhatah chuan tuizêma thil inziakte pawh AMC chuan ngaimawhin, dan loa tàr/ziah a ni tih hriattirna an ziak/târ zel bawk.