Hmasawnna hnathawhte thlir let

Siaha District Development Coordination and Monitoring Committee chu nimin khan an chairman CL Ruala, Lok Sabha MP leh co-chairman Ronald Sapa Tlau, Rajya Sabha MP hoin an ṭhukhawm a; Siaha district-a sorkar laipui scheme hnuaia hmasawnna hna thawh hrang hrangte an thlir let.

Meeting-a tarlan danin, MGNREGS hnuaiah kum kal mek 2017-18 chhungin inhlawhna ni 38 siam a ni tawh a; chutih laiin, IWMP fund Rs. 65,77,690 chu October 2015 aṭangin DWCDC-ah a la tâng. SSA-ah erawh chuan Mid-Day Meal sum a hun taka an dawng thung.

Pradhan Mantra Krishi Sinchayee Yojana (PMKSY) hnuaiah project hrang hrang - Restoration/Renovation of Small Tank leh Construction of Secondary Storage Structure, Construction of Water Harvesting Structure te hi zawh vek a ni tawh.

PMGSY hnuaia hnathawh zingah, Siachangkawn-Vawmbuk kawng siam leh Kaochao-Saikao kawng siamte chu zawh a ni tawh a; hna kal lai pawh kum 2017-2018 chhungin zawh hman beisei a ni.

Nausen kum khat hnuai lam thihna, infant mortality rate (IMR)-ah Siaha district chu Mizorama sang ber an la ni reng a, mahse, hma an sawn zel a, July-August, 2017 chhung khan nausen thi pasarih an awm a ni.