KHAWTHLIR

Presbytery Inkhawmpui
Mizoram Synod hnuaia inkhawmpui lian ber dawttu, Presbytery Inkhawmpui chu nizan khan Presbytery hrang hrangah ṭan a ni a, October 8, Pathianni zanah a ṭiak ang. Presbytery Inkhawmpuiah hian nimin khan committee hrang hrang an ṭhu a, vawiin leh naktukah nilengin rorel inkhawm neih a ni dawn. Pathianni chawhma inkhawmah kohhran upa tharte nemngheh a ni ang.

Mizo Summit
Mizo Convention (MC) leh Young Mizo Association (Tripura Group) huaihawtin nimin khan Vanghmun YMA Hall, Tripura-ah 'Tripura Mizo Summit' hman a ni a, Tripura-a Zohnahthlak hrang hrangte pungkhawmin, zanriah an kilho nghal a ni.

Tanpuina sem
Commerce & Industries department chuan nimin khan Ramhlun Indoor Stadium-ah Aizawl East-I, Aizawl North-I, Aizawl North-II, Aizawl North-III leh Aizawl West-I bial chhunga NLUP leh NEDP hnuaia ṭanpuina dawngtute hnenah ṭanpuina an sem a, NLUP Implementing Board chairman JH Roṭhuama'n a hmanpui.

Zangnadawmna pe
AH&Vety department bultumin nimin khan Champhai Kahrawt community hall-ah Champhai district-a PRRS vanga vawk chánte hnenah zangnadawmna pek a ni a, Champhai North bialtu MLA TT Zothansanga'n vawk chánte hnenah a hlan. Champhai district-ah hian PRRS vangin chhungkaw 1,839-in vawk 5,812 an chán a ni.

Tlan phal lo
Traffic SP chuan thupek chhuahin, October 8, Pathianni zing dar 9 aṭanga tlai dar 5 thleng Tuithiang Veng area-a kawng chhe lai siam a nih dawn avangin, hna thawh chhungin Chhinga Veng - Bethlehem Sihlui inkarah lirthei tlan phal a ni dawn lo tih a tarlang. Thupek hian chhiatrupna thil kângmei leh emergency kaihhnawiha duty leh dan leh thupek pawimawh bika duty-te chet velna a huam lo ang.