Chaltlang bazar sakna tur sum Nuai 250 K Deposit-ah dah a ni

RTI Act hmanga zawhna UDPA department SPIO-in September 19, 2022-a a chhan danin, Chaltlang Dawrkawna bazar building sak tur chu 'Chaltlang Public Utility Project providing Multipurpose Parking cum Vegetable/ Meat Market' tih a ni a, project cost chu cheng nuai 481 a ni.

UDPA department SPIO tarlan danin Chaltlang Public Utility Project cost cheng vbc. 481 chu tihdanglam a awm loh laiin, project component ṭhenkhat erawh tihdanglam a awm. In sakna tur sum cheng nuai 481 chu kum 2018-19 khan administrative approval hmuh niin, expenditure sanction cheng nuai 250 hmuh nghal a ni a; mahse, hemi kum vêk hian K Deposit-ah dah nghal a ni.

Chaltlang Public Utility Project providing Multipurpose Parking cum Vegetable/Meat Market satu tur thlan nan open tender chhuah a ni lo a, a satu atan Biakliana & Sons, Mission Veng thlan a ni. Contract-a inziak ang chuan, January 25, 2021-ah sak ṭan tur a ni a, July 25, 2022 (thla 18 chhungin) sak zawh tur a ni. Mahse, sak zawh hun a pelh hnu, August 25, 2022 thleng pawhin 30% chiah sak a la ni thung.

Chaltlang Multipurpose Parking cum Vegetable/Meat Market sak chungchangah hian UDPA director HVL Zarzoenga chuan July 1, 2020 khan UDPA Under Secretary hnenah lehkha thawnin, tender chungchangah sorkar thu an nghâk tih a thlen.

UDPA under secretary Zo­ram­siama Hmar chuan July 15, 2020 khan a chháng a, UDPA depart­ment enkawltu deputy chief minister Tawnluia hnen aṭanga July 9, 2020-a thu an dawn angin, restricted tender-a kalpui tur a nih thu UDPA Director a hriattir. Restricted tender hmanga contractor thlan theih zingah Biakliana & Sons bakah, Vanlalsanga leh F Kapsanga te hming tarlan a ni.