Kawngpuite siamṭha turin sorkar ngen

Hachhek Consti­tuency Development Committee (HCDC) chuan thuchhuah siamin, kuminah ruahtui a tlâk tam avanga Hachhek tlangdung mipuite'n inkalpawhna kawnga harsatna an tâwk nasa chu pawi an tih thu an tarlang a; an kawngpuite uluk taka enkawl a, a rang lama chùl màm hna thawk turin sorkar an ngen.

HCDC chuan, YMA leh mi tlawmngaite'n vawi tam kawng siama hnatlang an koh hnuah pawh tun thlenga Tuidam-Dárlâk inkar, Sabual lui thlang kawng siamṭhat a la ni lo chu pawi an tih thu sawiin, "Kawng dang hêlna a awm loh avangin a rang lama min siamṭhatsak turin Mizoram sorkar kan ngen a, lirthei chêtsual tamna leh nunna hial chàn phahna nasa zawk a thlen hmaa siam turin kan ngen a ni," an ti.

HCDC chuan, Hachhek bial chhunga kawng­pui pawimawh, siam zawhna pawh la rei lo Bairabi-Zamuang kawng a chhe leh hle tawh tih sawiin, chei hnûm a, châkkhai lâkna awlsama siam leh thuai turin sorkar an ngen a; Teirei lei siam mek leh Kanhmun leh Damcherra inkalpawhna lei dawh mek pawh a rang lama siam zo tura ngenin, an ngenna tihhlawhtlin a nih loh chuan an thiam dan anga hmalak an tum thu an puang a ni.