MZU-in Evolution Fest an buatsaih

India-in zalenna a hmuh kum 75-na lawmna Azadi Ka Amrit Mahotsav hnuaiah Ministry of Culture bul tumin Mizoram University-in nimin khan Evolution Fest an buatsaih. Zing kara hun hman chu School Education minister Lalchhandama Ralte-in a hmanpui a, chhun lamah Higher & Technical Education (HTE) minister Dr R Lalthangliana'n a hmanpui thung.

Evolution Fest puala MZU Mizo department leh Ace Events and Rentals-te'n nimin zinga Cycle Rally an buatsaih chu minister Lal­chhandama Ralte-in Vanapa Hall kawtah a vailiam a, Mizoram Cycling Association aṭangin mi 100 vel an tel.

Nimin chhun khan MZU Auditorium-ah Evolution Fest - Mizo Thu Leh Hla Ruaipui (Discourse on Mizo Language and Literature) buatsaih a ni a, HTE minister Dr R Lalthangliana'n a hmanpui.

MZU-a Mizo department buat­saih Evolution Fest hi October 7, 2022 thleng neih tur a ni a, vawiin hian Millennium Centre chung záwlah Mizo kutchhuak thil hlu pho chhuahna exhibition buatsaih a ni ang. Mizo ṭawng chungchang sawihona, career guidance, soft skills training leh cultural evening-te buatsaih tum a ni bawk.

HTE Minister chuan, chhan hrang hrang vangin Mizo ṭawngin hliam na tak a tuar mek nia sawiin, "A tidam theitu leh damdawi-in pan ngai loa siam theitu chu Mizote kan ni," a ti a; khawvel ṭhang mekah Mizo ṭawng leh literature thiam tel chunga hmasawn tum a pawimawh thu a sawi. 

Mizo ṭawng, thu leh hlate chu a ṭhang duang hle tih sawiin R Lalthangliana chuan, "Ṭawng hi a awm ngaiin a awm reng lo a, a che ve reng a ni. Mizo ṭawngah pawh a dik hlein a hriat a, kum za kal taa Mizo ṭawng leh vawiina Mizo ṭawng hi kan khaikhin chuan nasa takin a danglam tih hai rual a ni lo," a ti.

Dr R Lalthangliana chuan, Mizoram sorkarin Mizo ṭawng humhalhna tura din Mizo Language Development Board pisa tur chei mek a nih thu a sawi a; Google translation-a hman theih tura Mizo ṭawng dah a ni chu Mizo ṭawng humhimna atan a ṭangkai tur thu a sawi bawk.

HTE Minister sawi danin, kum 1991 chhiarpuiah Mizorama mi 78.12%-in Mizo ṭawng an hmang a, kum 2001-ah 75.92% leh kum 2011-ah 75.72%-in an hmang.

UNESCO-in February 17, 2009-a Atlas of World Languages a tihchhuahah khawvela ṭawng la nung mek 6,000 zinga a zatve chu kum 2,100 hmain a thi hman dawn tih tarlan a ni. Dinhmun derthâwnga awm ṭawng 2,498 zinga 196 chu India rama hnam tênau ṭawng niin, 80 chu hmarchhak biala mite a ni a, hmarchhaka ṭawng 80 zinga 13 chu Zo hnahthlak ṭawng a ni.

Minister hian Prof. Laltluangliana Khiangte ziah 'Zo lungthu pathum' leh 'Mizo thurochun' tih lehkhabu a tlangzarh a; khualzahawm Prof. Lalnundanga'n Prof. Laltluangliana Khiangte ziah tho 'Mizo thu leh hla chanchin' leh 'Mizo ṭawng chungchang' tih a tlangzarh bawk.