Governor-in ṭan la turin ADC-te a chah

Governor Hari Babu Kambhampati chuan nimin khan Raj Bhavan-ah autonomous district council (ADC) pathum hotu te, ADC hmalakna kaihhnawih department hotute leh Principal Accountant General-te a kâwm. Larsap chuan, account statement buatsaih danah ṭan la tur leh a hun takah Comptroller and Auditor General of India hnena report thehlut ṭhin turin ADC-te a chah.

Inkawmhonaah hian Lai Autonomous District Council (LADC), Mara Autonomous District Council (MADC) leh Chakma Autonomous District Council (CADC)-te'n CAG hnena an sum hmanna chipchiar, account statement a hun taka an thehluh theih dan tur leh ADC kaihhnawih thil pawimawh dangte sawiho a ni.

Governor sàwm angin ADC hotute'n an harsatnate an sawi a; District Council & Minority Affairs, Finance leh Planning department hotute leh Principal Accountant General office hotute'n ADC harsatna leh hmalakna kal mekte an sawi bawk.

Hari Babu Kambhampati chuan, account statement buatsaih danah ADC-te chu ṭan la tur leh a hun taka CAG hnena report thehlut ṭhin turin a hriattir a; ADC-te'n hmasawnna ruhrel siamna tur sum an nei tam tâwk lo tih a hriatpui thu sawiin, ADC hnuaiah hmasawnna ruhrel tam zawk thawh a nih theih nan sorkar laipuiin senso a tum (100%) tur project-te nasa zawka dap turin ADC hotute a chah.

Sum hman danah fimkhur a ṭul thu sawiin Governor chuan, "State sorkar hnuaiah chuan CAG-in ṭan lakna tur leh endik ngai nia a ziahte bawhzui turin Public Account Committee a awm a, hemi ang hian ADC-ah pawh mipui tana sum hman dan endiktu committee din ve a ṭha," a ti a; kum khatah vawi khat tal an hmalak dan leh harsatnate sawihoa ṭhukhawm ṭhin turin a chah bawk.

Ṭhutkhawma tarlan danin, ADC pathumte tana budget ruahman chu 2nd Mizoram Finance Commission-in rawtna a siam hunah hriat theih a ni dawn. ADC aṭanga rawtna thehluh tawh zingah - chief executive member, executive member leh MDC-te hlawh tihpun chungchang chu Council of Minister ṭhutkhawm huna rêl turin rawtna siam tawh a ni.