T Romana College kum 30 tlin lawm

T Romana College (TRC) chuan nimin khan an college kum 30 tlinna, pearl jubilee an lawm a, minister of state Robert Romawia Royte-in hmanpuiin, college library building thar a hawng.

Robert Romawia Royte chuan, zirlaite chu harsatna karah theihtawp chhuah turin a fuih a, "Retheihna hian zirnaa hlawhtlinna a dâl lo tih hi kan vawng reng tur a ni. Mizo zinga mi hlawhtling kan chhui hian a chiang em em a, harsatna leh retheihna kan tawhte hi min khalh ngíltu leh harsatna kan tawhte hmang ṭangkaia chhel leh hlawhtling tura beih fan fan hi zirlaite rilruah intuh se ka duh," a ti.

Robert Romawia chuan, changkannain a ken tel social media hman thiam leh hman ṭangkai thiam a pawimawh tak zet tih sawiin, "Social media kaltlangin thu tam tak kan chhiarin kan sawi thei a, tunlai hian a bikin hmeichhe ṭhenkhat aiin mipa ṭhenkhatte'n social media-ah ṭawngkam hman an uluk lo," a ti a, social media hman danah fimkhur turin zirlaite a chah.

Zirna ṭha tehna hrang hrang zingah admission hmuh ṭhat leh pass chhuak zatah thui tak a innghat tih sawiin Minister chuan, TRC-in campus vawn ṭhat leh thing leh mau humhim kawnga hma an lak dan chu entawn tlak a tih thu a sawi bawk.

TRC Library building hi Congress sorkar laia NEDP sum nuai 320 hmanga sak a ni a, chhâwng li, sq.ft. 12,821.11-a zau a ni. August 31, 2018-ah a lungphùm phùm niin, Lushai Engineers-in March 5, 2019-ah an sa ṭan a, October 25, 2021-ah sak zawh a ni.

Inkhawm hi Economic department HoD R Lalremliana'n a kaihruai a, principal Dr Jenifer Lalbiakdiki'n an college din dan leh an dinhmunte a sawi a, Infrastructure Committee secretary Prof. Malsawmliana'n technical report a pe. Chawhnu lamah pearl jubilee lawm a ni a, jubilee lungphun chu Principal-in a hawng.

T Romana College-ah hian zirlai 1,498, zirtirtu 36 leh thawktu dang 16 an awm mek a; college pearl jubilee lawmna leh building hawnnaah hian IASE Pricipal leh thawktu dangte leh Republic Vengthlang khawtlang hruaitute an tel a ni.