Agri. Minister-in Mizoram mamawh thlen

Agriculture minister C Lalrinsanga chuan October 3, Thawhṭanni khan Bangalore-ah Indian Council of Agriculture Research (ICAR) hnuaia Indian Institute of Horticultural Research (ICAR-IIHR) leh National Bureau of Agricultural Insect Resources (ICAR-NBAIR) a tlawh a, Mizoram mamawhte a thlen.

C Lalrinsanga chuan, ICAR-IIHR-in tomato chi hnih - Arka-Rakshak leh Arka-Samrat an siam chu Mizoramin an chìn avangin loneitute sum lak luhah hmasawnna a awm thu a sawi a; Mizoramin tomato a thar tam tâk avangin hmabak a neih dan te, chumi atana IIHR-in theihtawp a chhuahpui a ṭul thute a sawi a ni.

ICAR-IIHR director Dr Debi Sharma chuan, IIHR-in post-harvest technology chi hrang hrang leh incubation centre ṭha tak an neih thu te, agriculture lamah training an pek theih thu leh thiamna chi hrang hrang an hlan chhàwn theih thute a sawi a; Mizoram mamawh a thlenah Mizo ṭhalaite puih an inhuam thu Minister a hrilh.

ICAR-NBAIR principal scientist Dr Kesavan Subaharan nen an inkawmnaah C Lalrinsanga chuan, Mizoram sorkarin Lengpuiah chemical hmang loa thlai ei chhetu beihna bio-control laboratory a buatsaih mek thu leh, laboratory tihchangtlun nan NBAIR technology hrang hrang Mizoramin a mamawh thu a sawi.

ICAR-NBAIR hotute chuan, thlai ei chhetu vèn leh tihrêm kawnga chemical hmang lo záwnga Mizoramin hma a la chu lawmawm a tih thu an lo hrilh a; technology inhlan chhâwng turin theihtawp chhuahpui an inhuam thu an sawi bawk.

Minister hi Agriculture deputy director F Lalmalsawma leh Dr Samuel Lalliansanga ten an ṭawiawm a ni.