Assam mite'n Zophaia bûk an sak leh ṭhiah dan Home dept.-in an sawifiah
Mizoram sorkara Home department chuan thuchhuah siamin, Assam mite'n Bairabi Zophaia Ch Chhunga leileta October 2, 2022-a bûk an sak chu chief minister Zoramthanga, Home minister Lalchamliana, Home secretary H Lalengmawia leh Kolasib DC-te hmalakna avangin Assam lamin an ṭhiat leh niin an tarlang.
Home department chuan, Assam lamin Mizoram sorkar hriattir hmasa loa bûk an sa chu Mizoram sorkarin pawi a tih thu te, bûk ṭhiat nghal tura Mizoram sorkar hotute'n an hrilh anga Assam lamin hma an la nghal chu lawmawm an tih thu te, bûk ṭhiah a nih laia a hmuna Bairabi mipui leh Mizoram sorkar hotute uaptu MLA K Lalrinliana, minister of state fakawm an tih thute an tarlang a ni.
Assam lamin bûk an sak chungchang an hriat veleh sorkar hotute'n hma an la nghal tih sawiin Home department chuan, "Chief minister Pu Zoramthanga'n Assam CM Himanta Biswas Sharma chu phone-in a be nghal a, Home minister Pu Lalchamliana'n Assam Border minister Atul Bora chu October 2, 2022 zanah phone-in a be nghal bawk," an ti.
Home department chuan, Home secretary H Lalengmawia'n Assam Border Protection & Development department secretary GD Tripathi phone-a a biak thu an tarlang a; October 3, 2022 zingah Kolasib DC John LT Sanga'n Hailakandi DC hnenah phone-in thil awm dan a hrilh nghal bawk tih tarlangin, "Hailakandi DC chuan thuneitu sang zawk aṭanga bûk sak chu darkar hnih/thum chhunga ṭhiat tura thupek an dawn tawh avanga an ṭhiah nghal tak thuin a lo chhang," an ti.