Aizawlah sipai lâk rûnpui ṭan a ni

Sorkar laipuiin sipaia luhna tura Agnipath a kalpui hnua Mizorama sipai lâk rûnpui hmasa ber chu nimin khan Rajiv Gandhi Stadium, Aizawlah ṭan a ni a, Mizo ṭhalai ṭha­hnem tak an inlan. Sipai lâk rûnpui hi October 9, 2022 thleng neih a ni dawn.

Sainik Welfare & Resettlement director Surg.Lt.Cdr Lalnuntluanga hnen aṭanga thu dawn danin, Mizorama Agniveer Recruitment Rally neih turah hian sipaia ṭan tum mi 3,800 vel an inziak lut. Physical test bik chu nimin leh vawiinah neih tur a ni a, tlingte chu an document-te endiksak an nih hnuah medical test neih a ni ang a, chumi zawhah written test neih leh a ni ang.

Covid-19 lêng avanga kum hnih chhung sipai lâk thar theih a nih loh avangin tun ṭuma sipai lâkna bikah hian sipaia lut thar thei chin kum zat pawh kum hnihin tihsan a ni a, kum 23 chin lak theih an ni dawn.

Nakkum January thlaah soldier nursing assistant leh soldier nur­sing assistant (veterinary) lâk rûnpui, recruitment rally buatsaih tum a ni bawk a; October 30, 2022 thleng dilna thehluh theih a ni.