Mizoram sorkar a huaisen zel - MNF

MNF party chuan thuchhuah siamin, Mizoram leh Assam ramri chungchangah chief minister Zoramthanga kaihhruai Mizoram sorkar chu a la huaisen zel niin an tarlang.

MNF chuan, October 2, 2022 khan Bairabi Zophaiah Assam police-te'n bûk pahnih an sa tih sawiin, "CM Pu Zoramthanga chuan a hriat veleh Assam CM leh Home minister ni bawk Himanta Biswas Sharma leh Border Area Development minister Atul Bora chu telephone-a biain, an ṭhiah loh chuan indàwrna kal mek a bahlah thei a, thil ṭha lo zawk a thlen theih thu a hrilh a, chu mi hnuah Assam lamin an bûk sak chu an ṭhiat leh nghal a ni," an ti.

CM Zoramthanga hmalakna chu chhuanawm an tih thu sawiin MNF chuan, "Anmahni bûk sak ṭhiahtir lehtu CM huaisen tak hi kan chhuang tak zet. Ramri chungchangah inbiakna kalpui mek laia Assam-in ngawhngawl chhuaha hma an la fo hi MNF chuan a dem a, tinawn tawh lo turin a chah a ni," an ti a; Mizo ṭhalaite thinurna chawk tho lo turin an hriattir tih an tarlang.

MNF chuan, "Mizoram sorkar kan hrawn tawh zingah MNF sorkar tluka huaisen, a hun taka silai hmet puak ngam an la awm lo. Ramri buai hi eng political party mahin thangṭhat lak nana hmang lo tur leh eng pawl pawhin mahni pawl hming tihṭhat nan hman tum lo a, sorkar hmalakna ngaichâng a, hnam anga ṭangrual turin Zoram mipui kan ngen," an ti.

Bûk sak tirh aṭangin Home minister Lalchamliana, bialtu MLA K Lalrinliana, EFCC minister TJ Lalnuntluanga leh Serlui bialtu MLA Lalrinsanga Ralte ten a ṭul angin hma an la nghal nia sawiin lawmawm an tih thu an sawi a; Bairabi NGO leh zirlai pawlte leh Zophaia duty Mizoram police-te chungah an lawm thu an tarlang bawk.