Zoramthanga aia ṭha politician kan nei lo - Lalruatkima

Dawrpui Vengthang MNF Unit chuan October 3, 2022 zan khan an veng YMA hall-ah mithar lawmluh inkhawm an buatsaih a, an hun hmanpuitu MNF adviser Lalruatkima chuan Mizoin politician zingah Zoramthanga aia ṭha an nei lo niin a sawi.

Lalruatkima chuan Mosia pawh tlawm hle mah se, Israel-te a hruai chhuak tih sawiin, "Mizo politician zingah Pu Zoramthanga aia ṭha kan nei tlat lo. Vision neiin min hruai a, a tum ram min thlen ka ring tlat. Hripui, vawk hri, lirnghing, ramri buai leh hun khirha Zoram hruai chhuak turin Pathianin MNF sorkar a ruat tlat a ni," a ti.

Congress party chungchang sawiin MNF Adviser chuan, "Ṭhat loh theih lohna bawm an tihah ṭha thei reng reng lote an inkhungkhawm a, a beidawnthlak hle," a ti a, India ram politics thlir pawhin Congress-ah beisei tur a awm loh zia a lan chian thu a sawi.

Lalruatkima chuan ZPM chungchang sawiin, "Kalphung thar zuartute hian party hming, symbol leh flag thlak bak thlak an nei lo. An party-ah hian tu ber nge thu ber pawh a hriat loh. President nge working president nge leader thu ber a hriat loh. Chhungkua pawh thuneitu an tam lutuk chuan kalphung a mumal thei lo angin, an party kalphung a mumal lo hle," a ti.

MNF thuchhuah tarlan danin, MNF Adviser hian an party-ah mi 90 a lawmlut.