Grape chíngtute ṭanpui dan tur sawiho

Fostering Climate Resilient Upland Farming Systems (FOCUS) hnuaia Champhai district-a ruahmanna siamtu District Coordination Committee on FOCUS chu nimin khan an chairman James Lalrinchhana, bawrhsap kaihhruaiin DC conference hall-ah an ṭhukhawm a; grape chíngtu chhungkua 75-te ṭanpui dan tur an sawiho.

Ṭhutkhawmah hian kum 2021 aṭanga kalpui ṭan FOCUS kaltlanga Horticulture department hnuaia grape chíngtu chhungkua 75-te tana Area Expansion Scheme (AES) hmalakna chungchang leh, hmanraw leina tura thil man bituk (rate quotation)-te sawiho a ni.

Grape zàmna, a ban, a rah lawhna báwm leh a ṭang/zár cheh bunna leina tura ruahman Rs 20,46,563 chu rate ding lai pawm tur a awm mai loh avangin hmalak zel dan turah a rang lamin thuneitu sang zawkte beráwn chunga kalpui ni se, an ti a; hlo kahna leh leiṭha leina atana ruahman Rs 3,97,131 chu rate hman mek a awm avangin hmalak nghal ni se, an ti.

James Lalrinchhana chuan, FOCUS hnuaia hnathawhte chu uluk leh felfai taka kalpui a ṭul thu sawiin, "Hun bituk chhung ngeia ṭan lak a ṭul. Line department-te inkarah inpawhtlanna leh thawhhona ṭha a pawimawh a, mipui tana thawktu an nih avangin hamṭhatna leh hmasawnna a tam thei ang ber hun bituk chhung ngeia siam a nih theih nan an thawh a ṭul a ni," a ti.