Hripui vei enkawl lai an tlem tial tial

October 3, Thawhṭanni khan Mizoramah Covid-19 vei mi 28 hmuh chhuah a ni a, nimin khan hripui vei dam tawh mi 38 chhuahtir niin, hripui vanga thi an awm lo. Nimin tlai khan hripui vei enkawl lai mi 78 awmin, an tlem tial tial.

Thawhṭannia district hrang hranga Covid-19 positive hmuh zat chu Aizawl district-ah mi 11, Khawzawlah 10, Saitual leh Hnahthialah pahnih ve ve, Lunglei, Siaha leh Champhai district-ah pakhat ṭheuh a ni a; swab sample endik 355 aṭanga positive rate chu 7.89% a ni.

IDSP record angin, Mizoramah sample 19,83,564 endik tawh a ni a, Covid-19 vei 2,38,490 hmuh chhuah a ni tawh. Nimin tlai dar 5 thlengin mi 2,37,689 (99.66%) chhuahtir an ni tawh a, mi 723 (0.30%) thi tawhin, enkawl mek mi 78 (0.03%) an awm.

Nimin tlai dinhmun angin, Kolasib leh Lawngtlai district-ah Covid-19 vei enkawl lai an awm tawh rih lo a; active case 10 aia tamna district pathum - Aizawl, Lunglei leh Khawzawl district chiah a awm tawh a ni.