KHAWTHLIR

HBC-in thisen pe
Hrangbana College NSS chuan nimin khan an college-ah thisen pek an huaihawt a, Civil Hospital, Aizawl tan thisen unit 80 an pe a, petute mipa 66 leh hmeichhia 14 an ni.

SEDP sawiho
Lawngtlai District Socio-Economic Development Policy Committee chu an chairman Amol Srivastava, district bawrhsap kaihhruaiin nimin khan DC conference hall-ah an ṭhukhawm. SEDP line department-te chuan, SEDP sum pek chhuah phalna an hmu tawh a, ṭanpuina dawngtute bank account-a pawisa thun turin an buaipui mek tih an sawi hlawm.

Hnam Lam Intihsiak
Mizo Cultural Organisation (MCO) chuan October 3, 2022 zan aṭang khan Vankamlovi (Fam) Hriatrengna Hnam Lam Intihsiak an buatsaih a, Cultural Centre, Bawngkawn South-ah minister of state Robert Romawia Royte-in a hawng. Intihsiakna hi October 6, 2022 zanah zawhfel a ni ang.

Thosi hlo kâp
Aizawl South-I huam chhunga veng ṭhenkhatah tun hnaiah dengue a lêng a, mi eng emaw zatin an vei avangin bialtu MLA C Lalsawivunga chuan thosi hlo kâp turin thuneitute a ngen a, nimin khan Bethlehem Vengthlangah thosi hlo kah a ni a, veng dangah pawh kah chhunzawm tum a ni.

YMA Zawlbûk hawng
MLA Local Area Development Scheme hmanga sak Electric Veng YMA Zawlbûk chu nimin khan bialtu MLA C Lalmuanpuia'n a hawng. In sakna atan hian C Lalmuanpuia'n a MLA fund Rs 5,50,000 a pe a ni.

Keilungliah tuikhuah
Champhai khawpui kianga Keilungliah lui khuah mek hawn a nih hnua enkawl zui zelnaa hma latu tura din District Level Committee on Post Completion Management & Maintenance of Dam Reservoir cum Recrea­tion Centre at Keilungliah chu nimin khan chairman James Lalrinchhana, bawrhsap hoin an ṭhukhawm. UDPA leh PHE deptt. chu hmalak ṭul angte zir lâwk tur leh zir lâwkna hi ṭhutkhawm leh hunah thlirho ni se, an ti.