Eptute'n eirûkna lamah Min puhmawhna tur an hre lo - Hawla

Congress party president Lal Thanhawla chuan nimin khan Congress Bhavan-ah thu a sawi a; eptute chu eirukna leh thil dik lo tih lama sorkar hotute puhmawhna tur hre loah a puh.

Lal Thanhawla chuan, eirukna lama puhmawhna tur eptute'n an hriat loh avangin minister leh MLA-te chunga a lawm thu a sawi a, "MNF-te'n contractor-te nena inzawm angtein min sawi a, an ring tak tak a nih chuan Court-ah criminal case emaw PIL thehluh mai âwm a ni. Thu dik a lang vat mai dawn a lawm tih hi ka hrilh duh. Dâwta min puh hlawhchhamzia hi 2018 inthlanah a lang dawn," a ti.

A kaihhruai sorkarin hmasawnna hna a thawk tam nia sawiin Lal Thanhawla chuan, "Kan hnathawhte hi ka sawi séng lo. Kan hmachhawpte hi kan sorkar leh loh chuan an tichhe dawn. Khawvel hriata kan inpho chhuahna tura kan hma chhawpte hi kum nga kan sorkar leh chuan kan zo hman ang," a ti a; Mizoram chu khawvelah an pho chhuah dawn thu a sawi.

MPCC President chuan an party boruak a ṭha chho zel nia sawiin, "Hei hi hruaitute theihna, thiamna leh fel vang a ni lo. Min tichhe theitu chu keimahni kan ni a, a tichhetu ni lo tura fimkhur taka kal tur a ni," a ti.

Lal Thanhawla chuan MNF-te chuan direct takin BJP zawm lo mah se, an thawhpui tih a chian thu sawiin, "Zawm duh mah se, Mizoramah BJP peng an awm tawh si avangin anni zawm an tlawmngai tawh si a, a zau zawkah Guwahati lamah NEDA ah an zuk zawm ta ni," a ti.