Champhai Police Station-ah inâwk hlum

Mizoram police leh 10 Assam Rifles sipaite chuan October 4, 2017 tlai khan Zokhawthar daifêma in pakhatah heroin hawng 19 leh methamphetamine (meth) mûm 5,800 an man a; ruihhlo neitua puh zinga pakhat zawk, Rohungliana (37) s/o Nokulha, Khawmawi, Myanmar chu October 5, Ningani zing dar 5 vel khan Champhai Police Station lock-up ah inâwk hluma hmuh a ni.

Champhai Police hotute sawi danin, heroin an man hi J Lalnunmawii (38) d/o Nobilthanga, Zokhawthar in aṭanga an man a ni a; in neitu J Lalnunmawii (38) bakah, Rohungliana, Khaw­mawi, Myanmar chu a neitua ngaih niin man an ni. Champhai PS-ah NDPS Act tlawhchhanin thubuai ziah luh a ni a, Rohung­liana bik chu Foreigner Act hmangin thubuai siamsak tel a ni bawk.

Rohungliana hian Champhai PS lock-up chhunga blanket tláng pawt thlêrin, lock-up kawngka thirah a hlíng a, duty police-te hmuh loh laiin, October 5 zing dar 5 vel khan a inawk hlum niin an sawi. Rohungliana ruang hi October 5 vek khan Champhai District Hospital-a endik a nih hnuah an khua panpui a ni.

J Lalnunmawii ina October 4 tlaia ruihhlo an man hlut zawng chu cheng nuai 21.18 vela chhut a ni a; heroin hawng 19 chu Rs. 9,50,000 hûa chhût niin, meth mûm 5,800 hlut zawng chu Rs. 11,63,000 vel hùa chhût a ni thung.