Aizawl DC-in Chite lui a enfiah

Aizawl bawrhsap Dr A Muthamma leh Save Chite Lui Coordination Committee member-te chuan nimin khan Chite lui leh a chhehvel a tlawh a; Chite lui chhan chhuahna tura hmalakna hrang hrang kalpui mek chu Mizo tan mai ni lo, India ram pumpui tan pawh thil ropui leh chhinchhiahtlak a nih thu a sawi.

Dr A Muthamma hian Chite Mini Sports Complex aṭangin Bethlehem Vengthlang kai thlengin chipchiar takin Chite lui a fang a; September 29-a Aizawla college hrang hranga NSS-te'n Chite lui thenfai hnatlangpui an neih hnuah, Chite lui leh a kam vel fai dante a ernfiah a ni.

Aizawl DC hoin Chite lui kamah lui chhanchhuahna tura hmalakna atana ruahmanna hrang hrangte thlirho nghal a ni a; October thla chhungin Aizawl DC kaihhruainain Chite lui kam tuak veng hrang hrang local council, YMA, MUP leh MHIP hruaitute nena ṭhutkhawm koh ni se, an ti.

Chite lui hnâr lama bawlhhlawh paihna hmun langsar zual laiah check dam siam dan tur ngaihtuah turin Chief Secretary kaihhruaiin Save Chite lui Coordination Committee ṭhutkhawm pawh koh thuai ni se, an tih bakah, October thlaa Aizawla lo zin tur University of Minnesota mithiamte nen Chite lui chhanchhuahna tura zau zawka hmalak dan tur sawiho ni se, an ti bawk.

Aizawl DC hian Chite lui kama dan bawhchhiaa motor hmanga leivûng lo paih mek mi pakhat a man nghal. Chite lui leh a kam velah leivung leh bawlhhlawh khap a nih thu, Aizawl DC hmasain Cr.PC 144 tlawhchhanin a lo puang tawh a ni.

November 24, 2017-ah Chite lui thenfai hnatlangpui neih leh tur a ni a, chutah chuan Aizawla higher secondary school hrang hranga NSS unit-te an thawk chhuak ang.