Lo neitute sum lak luh tihpun dan ngaihtuah

Lo neitute sum lak luh tihpun dan tur ngaih-tuahhona, 'Doubling Farmers Income by 2022' chu nimin khan Agricul­ture department committee room-ah buatsaih a, Agricul­ture secretary Lalhming­thanga'n a hmanpui.

Lalhmingthanga chuan, Mizorama district tinah District Level Coordination Committee for Doubling Farmers Income by 2022 din a ni tawh tih sawiin, lawm­awm a tih thu a sawi a, "Sorkar laipui hma­chhawp ‘Doubling Farmers Income by 2022’ tihlawhtling tur­in sorkar scheme dang­te nen thlun zawma hmalak zel a ni ang," a ti.

ATARI, ICAR director Dr BC Deka sawi danin, India hmarchhakah KVK 85 siam a nih tawh a, chu'ng zinga pariat chu Mizorama awm a ni. KVK tinah khaw pakhat zel thlang chhuakin, kum 2022 ral hma ngeia chu'ng khuaa lo neitute sum lak luh tihpun tum a ni.

Doubling Farmers Income by 2022 kalpuinaah Indian Council of Agricultural Research (ICAR) chuan hma hruaiin, State Level Coordination Committee on Doubling Farmers Income by 2022 pawh Mizoram leh India ram state hrang hrangah siam a ni tawh a; Mizoramah chuan DC kaihhruaina hnuaiah district tinah District Level Coordination Committee on Doubling Farmers Income by 2022 din a ni tawh.

Workshop-ah hian district tina KVK-te chuan an awmna district ṭheuha khaw thlan bik (adopted village) chhung­a lo neitute'n agriculture aṭanga hlâwkna an neihte a pun theihna tura hma­chhawp hrang hrang an siamte thlirho a ni.