Hmasawnna hnathawh thlirho

Lawngtlai District Development Coordination and Monitoring Committee chu nimin khan an chairman CL Ruala, Lok Sabha MP leh co-chairman Ronald Sapa Tlau, Rajya Sabha MP hoin an ṭhukhawm a; Lawngtlai district-a sorkar laipui scheme hnuaia hmasawnna hna thawh hrang hrang an thlirho.

Meeting-a tarlan dan­in, MGNREGS hnuaiah April-August, 2017 chhungin ni 38 inhlawhna siam a ni tawh a, tunah hian district pumpuiah job card 29,114 a awm mek. Job card-a hming chuang, Aadhaar nei thei mi 57,961 zinga 8,600 chuan Aadhaar enrolment an ti tawh a ni.

PMKSY hnuaiah project 17 awmin, project I & II chu March 2017-ah a tawp tawh a, project dang 15 kalpui mek zinga project 13 chu sum awm loh vanga chawlh lailawk a ni a, project pahnihah chauh hna thawh theih a ni rih. Pradhan Mantri Awaas Yojana-Gramin (PMAY-G) hnuaiah kum 2017-18 chhung atana target beneficiary 1,817 aṭangin first phase-ah beneficiary 696 thlan tawh a ni.

Deendayal Upadhyaya Gram Jyoti Yojana (DDUGJY) hnuaia khaw pasariha êng pekna tura ruahmanna kalpui mek a ni a; Pradhan Mantri Gram Sadak Yojana (PMGSY) hnuaiah kawng laih mek paruk zinga pali chu zawh a ni tawh bawk.