KHAWTHLIR

Governor kâwm
Project Pushpak chief engineer Brig. Birender Singh leh director (Works) Manav Prasad chuan nimin khan Raj Bhavan-ah Governor Lt.Gen. Nirbhay Sharma an kâwm a, Lawngtlai-Diltlang-Parva kawng chungchanga an hmalak dan leh hmabakte an hrilh.

Puanthui khawl pe
Border Security Force (BSF) 159 battalion chuan Serchhipa Mizoram Police Wives Welfare Association-in puanṭhui zirna an dina hman turin nimin khan puanṭhui khawl an pe. 159 BSF commandant Col. LS Dahiya chuan, sorkar laipuiin ramria chêngte'n hma an sawn theihna tura a duan civic action programme chu ṭangkai taka kalpui mek a nih thu a sawi.

Thisen pe
Women Polytechnic NSS unit chuan nimin khan Durtlanga an hmunah blood donation camp an huaihawt a, Synod Hospital tan hmeichhia 19 leh mipa pahnihte'n thisen unit 21 an pe.

Faina hnatlang
GAD-in office memorundum a tihchhuah bawhzuiin nimin chawhnu khan Serchhip khawpuia sorkar pisa hrang hranga thawkte chu an pisa leh vantlang hmun tifaiin an hnatlang. School Education directorate-a thawkte pawhin nimin vek khan an pisa leh a chhehvelte tihfai hnatlang an nei bawk.

Thawhpuiah sáwm
Champhai district IPRO thar Dr Lallawmkima chuan nimin khan Champhai District MJA-te a pisaah a kâwm. IPRO chuan, sorkar hmalakna leh scheme hrang hrangte zau zawka puanzar a nih a, mipuiin an hriat zel theih nan thawhpuiah a sáwm a, àwn bik nei lo tur leh dikna ṭan a, rinawm leh taima taka mipuite tana ke pên zel turin a fuih.

Mamitah training
Agricultural Technology Management Agency (ATMA) chuan nimin khan Mamitah kuhva chingtute tan training an buatsaih a, kuhva chingtute tana hriattur pawimawh hrang hrang an zirtir.