MNF, ZPM leh BJP MLA-te'n an hlawh 30% Covid-19 do nan hman an remti
Assembly speaker Lalrinliana Sailo hoin nimin khan a pisaah MNF, ZPM leh BJP MLA-te an ṭhukhawm a; kumin May-December chhungin Covid-19 dona atan an hlawh aṭangin 30% thla tin lâk ṭhen an remti a, MLA fund aṭangin cheng nuai 50 thawh an rél bawk. Meeting-ah hian Congress party MLA-te ramri tlawha an zin avangin an tel lo a, anni chuan an duh danin thutlukna siam se, an ti.
Lalrinliana Sailo chuan, April 4, 2020-ah party hrang hranga MLA-te chu 'Kan ram tan tih theih kan nei em' tih ngaihtuaha an ṭhutkhawm tawh thu sawiin, "Party zawng zawng MLA-te an kim. Covid-19 dona atan kan thawh tawh bâk thawh a ṭha em tihte sawiho a ni a, party tin MLA-te chu mahni party ṭheuha ngaihtuahna séng a, inhmuh khawm leh ni se tih a ni," a ti a; Covid-19 dona atan sorkar, MLA, NGO, kohhran leh mipui an lungrual thu a sawi.
Congress Legislature Party (CLP)-in an inhuam dan a puan tâk avang leh MNF MLA-te'n an hlawh 40% leh an fund nuai 50 thawh an remtih thu a hnena an thlen avangin meeting an koh tak chûk chûk thu sawiin Speaker chuan, "MLA-te'n hma hruai rawh se tite an awm a, MLA-te hi Covid-19 dona atan ke pên hmasa an ni a, minister of state chinin an hlawh 50% leh MLA-te'n an kar khat hlawh an lo pe tawh a ni. Sorkar pawhin state pawisa cheng vbc. 20 chuang a hmang tawh," a ti.
ZPM Legislature Party leader Lalduhoma chuan, Speaker hoa April 4-a an inhmuh khawm hnuah ZPM MLA-te chu an inhmu khawm tawh tih sawiin, "April 4-a meeting-ah hian party zingah ngaihdan hran nei kan awm lo a, pên hmasa turah kan inngai hlawm. Meeting hnua ZPM MLA-te ṭhukhawm chuan hlawh leh MLA fund Covid-19 dona atan a ṭul ang ang hman kan remti a ni," a ti a; an thutlukna chu Speaker hoa meeting leh huna sawi chhuah atan an tih avangin a hrana an puan chhuah loh thu a sawi.
Lalduhoma chuan, MLA-te'n sum an thawh khawm a nih chuan duh dan an neih thu sawiin, "A hranpain account siam ila, Covid-19 dona atana thawh a nih ang ngeiin chumi atan chauh chuan hman ni se. Thil dang atan hman kan remti lo," a ti.
MNF Legislature Party secretary L Thangmawia chuan, MNF MLA-te'n pawisa thawh an inhuam viau thu sawiin, "Speaker hoa meeting-ah kan inhuam tlang vek a, MNF pawh kan inhuam a, mahse, a mal anga kal ṭha kan ti lo. Thil dik lo ni chiah lo mah se, CLP-in anmahni chiah inhuam anga an ti lai hi chu a mawi chiah loin ka hria," a ti a; MNF chuan MLA-te zawng zawng thawh bakah, Council of Minister-in MLA an nih anga an thawh bak Rs. 15,000 thawh se tih chu an duh dan a nih thu a sawi.
Meeting-ah hian deputy speaker Lalrinawma, MNF aṭangin L Thangmawia leh Lalrintluanga Sailo, ZPM aṭangin Lalduhoma leh Vanlalhlana, BJP aṭangin Dr BD Chakma an tel.
Meeting-a tarlan danin, CLP member-te chu Aizawlah pahnih chiah an awm a, a awm chhunte pawhin ramri vénga duty-te tlawh turin programme an lo siam tawh avangin meeting-ah hian tel thei an awm lo a ni.
Meeting-a sawi leh thurel Ṭhenkhat
• MLA-te'n kumin May-December chhung an basic pay aṭangin 30% thla tin CM Relief Fund-ah an pe ang.
• Hlawh aṭanga an pek bakah, Chief Minister-in Rs. 20,000 leh minister, speaker, deputy speaker leh deputy chief whip-te'n Rs. 15,000 ṭheuh thla tin an thawh belh dawn.
• Kum 2020-21 MLA LADS fund aṭangin MLA-te'n cheng nuai 50 ṭheuh CM Relief Fund-ah an chhûng ang.
• Congress Legislature Party (CLP)-te chu meeting-a an kal loh avangin an duh angin thutlukna siam tura tih an ni.
• CLP member Aizawla awmte ramria duty-te tlawh programme an lo siam tawh avangin meeting-ah an tel lo
• Covid-19 dona atan sorkar, MLA, NGO, kohhran leh mipui kan lungrual - Speaker
• ZPM MLA-te chuan kan hlawh leh fund Covid-19 dona atan a ṭul anga hman kan remti - Lalduhoma
• CLP-in anmahni chiah an inhuam anga an ti hi chu a mawi chiah lo - L Thangmawia