Tobacco Free Village ni turin ngen

Mizoram State Tobacco Control Society (MSTCS) chuan, Tobacco Free Village ni tura hmalak duh khuate chu an awmna district-a District Tobacco Control Cell emaw, State Referral Hospital-a State Tobacco Control Cell-ah emaw, smokefreemizoram@gmail.com ah emaw inhriattir turin an ngen.

MSTCS aṭanga thu dawn danin, MSTCS hian Mizoramah a tam thei ang ber Tobacco Free Village siam tumin hma an la tih sawiin, Mizorama a hmasa ber atan Thingsul Tlangnuam chu May 24, 2013 khan Tobacco Free Village atan puan a lo ni tawh tih an tarlang.

MSTCS tarlan danin, Ser­chhip district-a Khawlailung leh Buangpui, Kolasib district-a Thingdawl leh Champhai district-a Ruantlang khuaahte Tobacco Free Village ni turin hmalak mek a ni.

Minister John Rotluangliana'n a bial chhunga model village atana a thlan Dapchhuah leh MLA Lalrinmawia Ralte-in model village-a a thlan Kanghmun khuate Tobacco Free Village-a puang turin hmalak mek a ni a; sum mamawh angte pawh Mamit district Anti-Tobacco Squad chairman, Mamit DC kaltlanga pek chhuah a ni tawh.

Tobacco Free Village-a puan khuaahte chuan - vantlang hmunah meizûk a ni lo a, naupang kumtling lo hnenah zûk leh hmuam hralh a ni lo a, zirna in bul hnai ft. 300 bial chhungah zûk leh hmuam zawrh leh hralh a ni lo a, vaihlo zûk leh hmuam eng chi mah fak mawi a ni lo bawk.

Tobacco Free Village khuaah hian Anti-Tobacco Committee din a ni ṭhin a; Committee chuan an khawtlang dinhmunte zir chiang chungin zûk leh hmuam laka fihlim turin mipuite an zirtir a, a remchan dan angin khawtlang chanchinbuahte zûk leh hmuam ṭhat lohzia zirtirna leh hmalaknate tihchhuah ṭhin a ni.

MSTCS hotute chuan, Tobacco Free Village chungchanga hma­lakna chu mipui vantlang hriselna kawnga hmasawnna rahbi pawimawh tak a nih avangin Mizorama khuate'n intihhhmuh zel se an duh thu an sawi a; mipui vantlang hriselna pawhin chak takin hma a sawn phah an beisei thu an sawi bawk.