Mahni nupui thattu thiam loh chantir
August 10, 2013 zana a nupui thattua puh, Lalremruata Ralte, Zarkawt chu Aizawl Additional District and Sessions judge-I Vanlalmawia Court-in thiam loh a chantir a; hrem dan tur chu tun karah puan tum a ni.
Thu dawn danin, Aizawl Additional District and Sessions Judge-I chuan July 28, 2017 khan Lalremruata Ralte hi IPC Section 302 (tualthah thubuai) hmangin thiam loh a chantir a, dam chhunga tàntir emaw, thi tur emawa hrem theih a ni dawn.
A nupui K Zohmangaihi ruang a paihnaa puitu, Lalthlamuanpuia (Lalremruata ralte unaupa), Kolasib Hmarveng pawh IPC Section 201 tlawhchhanin thiam loh chantir a ni bawk.
Thubuai ngaihtuahtu, Aizawl Addl. District & Sessions judge-I Vanlalmawia hi a damloh avangin district judge Lucy Lalrinthari'n thubuai hi September 22, 2017 khan Additional District & Sessions judge-II Vanlalenmawia kutah a hlan a ni.
K Zohmangaihi nu, Lalhmingthangi Chhangte, Ramhlun North chuan a fanu chu August 10, 2013 aṭangin chin hriat loha a bo avangin August 18, 2013 khan Aizawl Police Station-ah FIR a thehlut a; police-te chuan Zohmangaihi pasal, Lalremruata Ralte chu an man a ni.
Police hmaa a inpuan danin, Lalremruata Ralte hian a nupui K Zohmangaihi chu August 10, 2013 zanah Zarkawta an chenna inah a that a, a ruang chu a nau, Lalthlamuanpuia nen motor-a phur chhuakin, August 10, 2013 zing dar 5 velah Sihphir dái, Sakawrhmuituai khâmah an paih a ni. K Zohmangaihi ruang hi August 19, 2013 tlaiah hmuh a ni.