Children's Science Congress buatsaih a ni

Rashtriya Madhyamik Shiksha Abhiyan (RMSA) leh Science Teachers' Association of Mizoram (STAM) chuan October 5-6, 2017 khan Pachhunga University College (PUC) seminar hall-ah state level Children's Science Congress vawi 25-na an buatsaih.

Children's Science Congress hawnna, October 5-a neihah PUC principal Dr Tawnenga khuallian a ni a; a khârna, October 6-ah School Education director K Lalthawmmawia khuallian a ni thung. Science Congress-ah hian district pariat aṭangin an aiawh zirlai kum 10-17 inkar team 32 an tel a, science project an siam hmangin an inel a ni.

Kumina Children's Science Congress thupui chu 'Science, Technology, Innovation for Sustainable Development' tih a ni a; state level-a ti ṭhate aṭangin National Children's Science Congress, Gandhinagar, Gujarat-a tel turin zirlai pariat leh Indian Science Congress, Osmania University, Hyderabad-a tel tur zirlai pahnih thlan nghal a ni.

Tun tum Children's Science Congress-ah hian CSIR-Central Institute of Mining and Fuel Research, Dhanbad-a principal scientist Dr C Sawmliana'n power point presentation hmangin leilung chanchin a sawi bawk.

National Children's Science Congress-a tel turte
1. F Zodinpuia, Z Rosanga School, Lunglei
2. Zoremsanga Ralte, Mamit H/S-II
3. Benjamin Lalmuankima, St. Paul's HSS
4. Lalduhtluanga, Marian H/S, Serchhip
5. ZD Lalhlimpuii, Baptist HSS, Lunglei
6. H Lalfakawmi, Champhai Vengthlang PES
7. Vanlalfakawmi, PC Girls' School, Aizawl
8. Awmpuii Khenglawt, St.Maria Gorettis, Kolasib
Indian Science Congress-a tel turte
1. Darsy Beirongiarili, RMSA School, Siaha
2. Jonathan H Lalrammawia, St.Paul's, HSS