Media-in Reieka RD hnathawh an tlawh

Rural Development (RD) department hnuaia Reiek RD block chhunga hna thawhte chu October 6, Zirtawpni khan MJA general headquarters member-te'n president Vanlalrema Vantawl hoin an tlawh a; central leh state sorkar sum hmanga hna thawh hrang hrangte an en.

MJA member-te hi Reiek BDO ST Lalven­sang­i leh APO (MGNREGS) Baby B Zonun­tluangi ten an lo dawngsawng a; Reiek leh a chheh­vela mipui tana sorkar hmalakna hrang an enpui.

MJA member-te'n an tlawhte chu Social Welfare department nen ṭang duna anganwadi centre sak leh a hmunhma chei te, changpât hmanga lei-ṭha siamna te, inthiarna tur ek-in la nei lote tana ek-in sak te, mipuiin MGNREGS inhlawhnaa hna an thawh hrang hrang leh mi harsate tana in sakna tur ṭanpuina PMAY (Gramin) hnuaia in sakte a ni.

Reiek RD Block chhungah khaw 22 a awm a, kum 2016-17 sorkar kum chhung khan MGNREGS hnuaiah Social Welfare department nen ṭang dunin Darlung, Dapchhuah leh Rawpui­chhipahte anganwadi centre sak a ni. Mi 81 hnenah changpât leiṭha (vermi compost) tihna tur siamsak a ni a, ṭhenkhatin an hman ṭangkai viau laiin hmang ṭangkai zui vak lote pawh an awm niin chanchinbumite chuan an hmu.

Kum 2016-17 chhung­in individual household latrine (IHHL) hnuaiah ek-in nei ṭha lo chhungkaw 32-te ek-in sakna tur sum pek a ni a; kum 2017-18 chhungin MGNREGS sum hmangin ek-in 16 sak a ni. Reiek Block chu páwn lama inthiar awm lohna, open defacation free-ah an inpuang thei tawh niin BDO ST Lalvensangi chuan a sawi.

Kum 2016-17 chhung­in Reiek Block hnuaiah Housing for All atana hmalakna, in sakna tur sum nei lote ṭanpuina - (PMAY(G)-ah chhungkaw 32 thlan a ni a, first instalment pek tawh niin, second instalment an beisei mek. IWMP/PMKSY hnuaiah tuihna humhalh nan lui leh kawrte humhalha thawm ṭhat a ni.

MGNREGS hnuaia mipui tana inhlawhna siam zingah, mimal sangha dil laihsak leh buh chìnna tur terrace siamsakte telh a ni a; mimal rama inhlawhna chu MGNREGS-a wage component hnuaiah tih theih a nih thu BDO chuan a sawi.

ST Lalvensangi chuan, sorkarin department inkaihhnawih bikte scheme/programme kal kawptir (convergence) chu a ṭangkai hle tih a sawi a; chutih rualin, department thawkho turte an sum neih hun inang lo a awm ṭhin avangin duh anga hmalak chak a har ṭhin niin a sawi bawk.