Lungleiah RTI Week hman a ni

October 5-12, 2017 chhunga India ram puma ‘Right to Information (RTI) Week’ hman mek pualin October 6, 2017 khan Lunglei College multipurpose hall hun hman a ni a, Mizoram chief information commissioner (CIC) Lalduhthlana Ralte-in a hmanpui.

Lungleia RTI Week hman hi Mizoram Information Commission (MIC) leh IPR department buatsaih a ni a, Lalduhthlana Ralte chuan, mipui rorelna sorkar (democracy) leh RTI chu thil kal kawp tlat a ni tih sawiin, "Sorkar hmalakna leh hnathawhte hriat hi khua leh tuite chanvo a ni," a ti.

RTI Act chu India rama state dangte aiin Mizoramah mipuiin an la hmang tlem tih sawiin CIC chuan, "RTI Act chungchang hi mipui zingah inhrilhfiah chhunzawm zel a ṭul tak zet a, a ṭangkai tur anga mipuiin an chhawr thiam theih nan inzirtirna chak taka kalpui zel a ṭul," a ti a; mipuite chu RTI Act a nih dan tur taka hmang ṭangkai turin a chah.

Khualzahawm Lalzarmawii, Lunglei DC pawhin thu sawiin, RTI Act chu sorkar langtlang leh mawhphurhna hlen thei awm theihna tura duan a ni tih a sawi a, "He dan ṭha tak hmang ṭangkai tur leh a nih dan tur taka hmang tur chuan a hman dan tur kalhmang chiang taka kan hriat a ṭul," a ti.

RTI Week puala MIC-in auhla (slogan) inziahsiaka lawmman dawngtu Lalrinhlua, HATIM-a zirlai zirlai hnenah CIC Lalduhthlana'n lawmman Rs. 2,000 leh thuchei a hlan.

Chawhnuah RTI Act chungchang zirhona buatsaih a ni a, CIC Lalduhthlana Ralte-in MIC hmalakna tlangpui a sawi. MIC secretary Vanlalngena'n RTI hman dan leh SPIO/SAPIO leh DAA-te mawhphurhna leh tih turte a sawi a; JB College-a associate professor Mary Lalromawii'n 'RTI leh mipuite’ tih thupui a sawi bawk.

Lungleia RTI Week hmannaah hian sorkar department hotu te, DAA, SPIO leh SAPIO te, tlawmngai pawl aiawh te, khawtlang hruaitu te, Lunglei MJA member te, politicial party aiawhte leh zirlaite an tel a ni.