RAT hmanga enfiah chungchang sawifiah
Covid-19 chungchanga sorkar thupuangtu, Dr Pachuau Lalmalsawma, State Level Task Force on Covid-19 secretary ni bawk chuan nimin khan Mizorama Covid-19 Rapid Antibody Test (RAT) hman mek chungchang a sawifiah a; RAT kit chu thisena Covid-19 hnûhmá a awm leh awm loh enna a nih thu a sawi.
Dr Pachuau Lalmalsawma chuan, "Covid-19 RAT hi thisena Covid-19 hnûhmá a awm leh awm loh endikna a ni a, natna hrik kan taksaa a luh hian kan thisenah taksaa natna dotu (antibody) a insiam ṭhin. Chutiang chiah chuan, Covid-19 hrik miin a kai pawhin a antibody kha a taksaah insiamin, chu antibody man chhuak tur chuan test kit hi hman ṭhin a ni," a ti.
Covid-19 lèn aṭanga hun rei lo tê chhungin Covid-19 RAT kit ho chu taksaa antibody hmuhchhuah nan chi hrang hrang rang taka siam chhuah a nih avangin, endikna hun pawh a chêp hle tih sawiin Dr Lalmalsawma chuan, "Natna dang vanga taksaa antibody dang awmin test result felfai tawk lo a siam thei a, Covid-19 test-na kháwlpui hmanga finfiah nawn a ngaih cháng a awm thei," a ti a; chuta tan chuan ZMC-a Covid-19 Testing Laboratory chu tun hnaiah pawh hman a nih thu a sawi.
Covid-19 Spokeperson sawi danin, tun hnaia India hmarchhak state aṭanga rawn hawte zingah RAT kit hmanga enfiahnaah chiang tâwk loa ngaih an awm avangin, Lawngtlai, Mamit leh Aizawl district-a mi ṭhenkhat chu ZMC Laboratory-ah endik nawn an ni a, Covid-19 an kai lo tih finfiah a ni.
RAT hmanga en hnuah RT-PCR kháwla en ngai an awm zeuh zeuh tih sawiin Dr Lalmalsawma chuan, "Hetiang hunah hian Covid-19 veia inngaih mai tur a ni lo. Test kit ho hi ngialngan taka mimalah natna finfiahna tura duan a nih loh avangin tu mahin chî-âi nan hman loh tur a ni," a ti.
Dr Pachuau Lalmalsawma chuan, antibody chu damlo dam tawh hnuah pawh hun rei tak an la chámbáng thei tih sawiin, "Covid-19 RAT kit hian a la man chhuak leh fo ṭhin bawk. Covid-19 hi natna thar a nih avangin antibody kan taksaa a awm chhung pawh zir chianna engmah a la awm lo," a ti a; chuvang chuan, antibody awm chhung chu Covid-19 rapid test kit hi a reactive dawn tih a sawi.