Intensified Mission Indradhanush Health Minister Thanzara'n a hawng

December 2018 ral hmaa India ram puma naupang kum hnih hnuai lam leh nu naupai zinga 90%-te hri danna (vaccine) pek kimna tur programme, Intensified Mission Indradhanush (IMI) chu nimin khan Health minister Lal Thanzara chuan Chief Minister’s Office kawtah a hawng.

Health Minister chuan, IMI-in a tum ber chu, hri danna, 'Inchiu (vaccine)-in natna a ven theih lak aṭangin tu naupang mahin nunna an chán tur a ni lo,' tih a nih thu a sawi a; December 2014-a India ram puma Mission Indradhanush kalpui a nih hnuah, naupang tam zawkin an chhawr theih nan huam zau zawka hmalakna tur IMI ruahman a nih thu leh, IMI chu Mizoramah chuan high priority district - Lawngtlai, Lunglei leh Mamit district-ahte kalpui tur a nih thu a sawi.

Lal Thanzara chuan, mahni fate'n hri danna hi an lâktir vek chuan nunna chàn theih natna lak aṭangin man loin chhan theih a ni tih mipuiin hria se a duh thu a sawi a; mahni awmna sub-centre hnai berah hri danna lak mai theih a nih thu a sawi bawk.

IMI hawnna hi National Health Mission mission director Dr Lalrozama'n a kaihruai. IMI programme officer Dr Lalzawni sawi danin, kum 2015 aṭanga Mizorama MI kalpuiah thawh li zawh a ni tawh a, a thawh ngana tur chu IMI-in chhunzawm tur a ni. Lunglei, Lawngtlai leh Mamit district chhungah IMI hi session 109-ah neih tum a ni.

IMI hi prime minister Narendra Modi-a'n October 8, Pathianni khan Gujarat-ah a hawng a, state tinah programme hi hawnna neih tur a nih angin Mizoramah pawh nimin khan a hawnna inkhawm hman a ni.

IMI hmaa MI kalpui tawhah April 2015 aṭanga July 2017 thlengin India rama district 528 tuam a ni a, Mizoramah pawh district zawng zawng tuam hman a ni. Naupang nuai 247 chuang leh nu naupai nuai 67 vel hnenah hri danna leh damdawi pek a ni. MI hmang hian kum 2020-ah nau piang zawng zawng aṭanga 90% tal hri danna an dawn tur ang pek kim tum a ni a, mahse, kalpui tawh dan aṭanga thlirin, target hi thleng zo dawn loa hriat a nih avangin IMI hi duan a ni.

IMI hmang hian naupang/nausen leh an nu te, MI hnuaia hri venna damdawi an dawn tur ang dawn ṭhat loh zualna district tuam tum a ni a; MI aia changtlunga kalpui tum niin, sorkar ministry/department tam zawk inhnamhnawihtir tum a ni dawn.

IMI hi thawh li-a neih tur a ni a; October 7, 2017-ah round-1 ṭan tura tih niin, round khat chu chawlhkar khat chhung zel kalpui tur a ni a; November 7-ah round-2, December 7-ah round-3, January 7, 2018-ah round-4 ṭan a ni ang.