Police constable nih tum 24,228 tling tawh

Mizoram police eng emaw zat lak thar turah nimin thleng khan constable bikah diltu mi 24,228 an tling tawh. Dilna hi vawiin thleng thehluh theih a ni.

Police DIG (Training) C Laldina'n Vanglaini palai a hrilh danin, police chi hrang hrang lak turah hian Police department chuan constable bik an buaipui dawn a; a dang zawng chu MPSC lamin an buaipui thung dawn. Constable bikah hian nimin thleng khan diltu mi 24,228 an tling tawh a ni.

C Laldina sawi danin, police constable lak turah hian October 16, 2017 aṭang­in recruitment ṭan tur a ni a, registration leh physical measurement tih hmasak ber a ni ang. Registration leh physical measurement atan hian dawhkan 16 buatsaih a ni a, ni khatah dawhkan pakhatah mi 300 zel buaipui hman tura ruahman niin, dawhkan 16-ah chuan ni khatah mi 4,800 vel buaipui hman an inbeisei.

Application form serial no. 1 aṭanga ṭan tur a ni a, mahni huna lang hman lote tan October 14, Inrinni-ah registration leh physical measurement tih leh tum a ni bawk.