Rohingya vangin ramriah sipai company pariat dah belh tawh

Myanmar ram, Rakhine state-a awm Rohingya hnamte hmun hrang hrangah an ráltlàn mek avangin, Mizorama an luh loh nan Mizoram sorkar leh India sorkarin a ngaihven mek a; tun hnaiah ramri hrûl velah sipai company pariat dah belh a ni.

Vanglaini palai zawhna chhanga CID (Special Branch) SP RD Chawngthu-in a sawi danin, Rohingya ráltlánte Mizorama an luh loh nana veng turin Mizorama awm sa Assam Rifles, Aizawl, Serchhip leh Lungleia awm mekte aṭangin sipai eng emaw zat pawh khawm a ni a, tun hnaiah ramri hrûlah company pathum dah belh a ni tawh.

Assam, Manipur leh Nagaland-a awm Assam Rifles-te pawh pawh khawm an ni a, Mizorama international border bul hnaiah campany panga dah belh a ni bawk.

Zawhna chhangin RD Chawngthu chuan, Myanmar rama Rohingya Muslim-te awmna, Rakhine state chu Mi­zoram aṭangin a hlá tih a sawi a, "Mizoram nen kan inrî lo a, an awmna a hlat avangin Mizoramah an rawn luh a rinawm loh. Hnam leh ṭawng chungchang avang pawhin kan rama rawn luh an duh a rinawm vak lo," a ti.