YMA General Conference puala Sum hmuh cheng nuai 163 a tling

October 17-19, 2017 chhunga YMA General Conference vawi 71-na neihna tur, Champhai Zotlang khelmuala pandal sak mek chu 75% vel zawh a ni tawh. Conference atana Organising Committee-in sum an hmuh tawh leh la hmuh tur belh­khawm chu cheng nuai 163 a tling.

YMA General Conference neihna tur pandal sak mek chu October 7, Inrinni khan Champhai IPRO leh Champhai district MJA ten an tlawh a; Organising Commi­ttee chairman H laltuliana chuan, conference thleng tura inbuatsaihna chu 75% vel zawh a nih tawh thu leh tun kar tàwp lamah pandal hlanna neih tum a nih thu a lo hrilh.

H Laltuliana sawi danin, YMA General Conference thlenna tur pandal sak mek chu harsatna dang a awm loh chuan naktuk, Nilaini-ah zawh tum a ni a, a dung ft. 190 leh a vâng ft. 160-a zau niin, mi 10,000 len theihna tura ngaih a ni. Pandan sa turin Chakeshawari Tent House, Silchar chu Rs. 16,00,000-in rawih an ni.

Zawhna chhangin H Laltuliana chuan, YMA General Conference thlenna tur hian Organising Chairman-in sum ṭhahnem tham tak an hmu dawn tih a sawi a; sum an hmuh tur belhkhawm chu cheng nuai 163 a ni.

H Laltuliana sawi danin, Cham­phai Zotlang huam chhung kawngpui siamṭhatna atan CM-in NEDP aṭangin cheng nuai 100 a pe a, chu sum hmang chuan PWD-in kawngpui thawm ṭhat hna an thawk. Pandal hmunhma cheina leh conference thleng tura inbuatsaihna atan Champhai South bialtu MLA-in a MLA fund aṭangin cheng nuai 10 a pe.

Mizoram MP pahnih - CL Ruala leh Ronald Sapa Tlau ten an MP fund aṭangin cheng nuai 10 ve ve an pe a; Champhai North bialtu MLA-in MLA fund aṭangin Rs. 5,00,000, Home Minister-in BADP sum aṭangin cheng nuai 18 leh, Sports Minister-in cheng nuai 10 an pe bawk. Sum an hmuh tur hi a ṭhen chu an hmu tawh a, la hmuh loh eng emaw zat a la awm.