Politics hi induhsakna tur a ni lo - Chief Minister

Chalfilh bial chhunga lei leh kawng siam tur lawmna hun nimin khan Dilkhan khaw khelmualah hman a ni a, khuallian, chief minister Lal Thanhawla chuan, politics chu induhsakna tur a nih loh thu a sawi.

Chief Minister chuan, mahni bial ṭheuhah poli­tical party-te en hrang loin, kaihkuah bik nei loa awm tur a nih thu sawiin, "Chhungkhat leh laina hnai duhsak bikna atan politics hi hman tur a ni lo. Tu pawh ni se, ang khat veka en tur a ni. Mizoramah chuan tlawmngai pawl ṭha tak kan nei a, hengte nen hian thawhho thiam a ngai," a ti.

Eng hna pawh ni se, Pathianin min hûnna a ni tih hriat a pawimawh thu sawiin Lal Thanhawla chuan, "Eng pawh thawk ila Pathianin rawngbawl tura min dahna a ni tih hriat a pawimawh," a ti a; Pathian malsawm tlaka hna thawh a pawimawh thu a sawi.

CM Lal Thanhawla chuan, sum ngainat chu sual tinreng bul a nih thu sawiin, "MLA-te ngat phei hi chu engtik hunah pawh, duh duhin min lepse ngama awm tur a ni tih hi kan infuihna a ni," a ti.

Chalfilh biala khaw mipuite chu MLA ṭha tak an neih vanga lawm nacháng hre tura chah­in Chief Minister chuan, "Hmasawnna in neihte hi bialtu MLA-in a ngaihna a hriat vang a ni. Mahse, mipuite khawtlang hruai­tute ṭawiawmna tel lo chuan bialtu MLA remhriat­na ringawt a tawk lo," a ti a; hmasawn tur chuan ṭanho a pawimawh thu a sawi.

Bialtu MLA Dr Ngurdingliana pawhin thu sawiin, "Kan bial hi hmânah chuan hmàr thimpui min ti ṭhin. Chutiang chu kan nih loh avangin he hun hi buatsaih kan ni. Nakkum inthlan hma chuan khuain min bumro loh chuan kan bial chhunga kawng zawng zawngin alkatra-a luan vek a ni ang," a ti.

MLA a nih aṭangin thil tum pathum a neih thu sawiin Dr Ngurdingliana chuan, "Party manifesto bakah, zirna, kawng leh hriselna lama hmasawnna ka ngai pawimawh a ni," a ti a; a thil tum pathumah hian hmasawnna a awm zel avanga lawmawm a tih thu a sawi.

PWD chief engineer (Roads) John Rammawia sawi danin, Chalfilh bialah hian PMGSY, State Plan Fund, NEC, NEDP leh NABARD aṭangin kawng leh lei eng emaw zat siam tawh a ni a, siam tur eng emaw zat a awm a ni.